13 ദിവസം കൊണ്ട് 900 കോടി ക്ലബ്ബില് ഇടം പിടിച്ചിരിക്കുകയാണ് ഷാരൂഖ് ഖാന് ചിത്രം ‘ജവാന്’. അറ്റ്ലിയുടെ സംവിധാനത്തില് എത്തിയ ചിത്രത്തില് നയന്താര ആയിരുന്നു നായിക. എന്നാല് തന്റെ ബോളിവുഡ് അരങ്ങേറ്റ ചിത്രത്തില് നയന്താര തൃപ്തയല്ലെന്ന റിപ്പോര്ട്ടുകളാണ് ഇപ്പോള് പുറത്തു വരുന്നത്.
ചിത്രത്തില് നയന്താരയുടെ റോള് വെട്ടിക്കുറച്ചതില് താരത്തിന് സംവിധായകനോട് അതൃപ്തി ഉണ്ടെന്നാണ് റിപ്പോര്ട്ടുകള്. ജവാനില് കാമിയോ റോളില് എത്തിയ ദീപിക പദുക്കോണിന്റെ കഥാപാത്രത്തെ ഉയര്ത്തി കാണിക്കാന് ശ്രമിച്ചു എന്നതാണ് ഇതിനുള്ള കാരണമായി ചൂണ്ടിക്കാണിക്കുന്നത്.
ദീപികയുടെ കഥാപാത്രം സിനിമ കണ്ടിറങ്ങിയവരുടെ മനസില് ഇടംനേടിയിരുന്നു. നായിക നയന്താര ആണെങ്കിലും കാണുന്നവര്ക്ക് ഷാരൂഖ്-ദീപിക ചിത്രമായേ ജവാന് അനുഭവപ്പെടൂ എന്നതും നയന്താരയെ നിരാശപ്പെടുത്തി. തന്റെ കഥാപാത്രത്തെ ചെറുതാക്കിയ അറ്റ്ലിയോട് ദേഷ്യത്തിലാണ് നയന്താര എന്നും റിപ്പോര്ട്ടുകളുണ്ട്.
ജവാന്റെ പ്രൊമോഷന് പരിപാടികളില് നിന്നും നയന്താര വിട്ടുനിന്നതും ശ്രദ്ധിക്കപ്പെട്ടിരുന്നു. മുംബൈയില് നടന്ന ചിത്രത്തിന്റെ വിജയാഘോഷത്തിലും താരം പങ്കെടുത്തിരുന്നില്ല. ഷാരൂഖ് ഖാന്, ദീപിക, വിജയ് സേതുപതി, അനിരുദ്ധ് രവിചന്ദര്, അറ്റ്ലി, സന്യ മല്ഹോത്ര, റിധി ദോഗ്ര എന്നിവര് ചടങ്ങില് പങ്കെടുത്തിരുന്നു.
എന്നാല് നേരത്തെ താന് അഭിനയിച്ച ചിത്രങ്ങള്ക്ക് പിന്തുടരുന്ന നോ പ്രൊമോഷന് നയമാണ് നയന്താര ഇക്കാര്യത്തിലും പിന്തുടരുന്നത് എന്നാണ് ചിലരുടെ വാദം. അതേസമയം, സെപ്റ്റംബര് 7ന് തിയേറ്ററില് എത്തിയ ജവാന് 1000 കോടി ക്ലബ്ബിലേക്ക് കുതിക്കുകയാണ്.