കഴിഞ്ഞ വർഷത്തെ സർപ്രൈസ് ഹിറ്റായിരുന്നു നഹാസ് ഹിദായത്ത് സംവിധാനം ചെയ്ത ‘ആർഡിഎക്സ്’ എന്ന ചിത്രം. നഹാസ് ഹിദായത്ത് സംവിധാനം ചെയ്യുന്ന അടുത്ത ചിത്രത്തിനായി പ്രതീക്ഷയോടെ കാത്തിരിക്കുകയാണ് ആരാധകർ.
എന്നാൽ ഇപ്പോഴിതാ സൂപ്പർ സ്റ്റാർ രജനികാന്തിനെ സന്ദർശിച്ച് ചിത്രങ്ങൾ പങ്കുവെച്ചിരിക്കുകയാണ് നഹാസ്. കൂടെ ആർഡിഎക്സിന്റെ ആക്ഷൻ കൊറിയോഗ്രഫി ചെയ്ത അൻപറിവ് മാസ്റ്റേഴ്സും ഉണ്ടായിരുന്നു. രജനിയെ നായകനാക്കി നഹാസ് ഒരു ചിത്രം സംവിധാനം ചെയ്യുമോ എന്നാണ് ചിത്രം പങ്കുവെച്ചതിന് ശേഷം വരുന്ന കമന്റുകൾ.
അതേസമയം ടിജെ ജ്ഞാനവേൽ സംവിധാനം ചെയ്യുന്ന ‘വേട്ടയ്യൻ’ എന്ന ചിത്രത്തിന്റെ ചിത്രീകരണത്തിലാണ് രജനീകാന്ത് ഇപ്പോഴുള്ളത്. ജയ് ഭീം’ എന്ന ചിത്രത്തിന് ശേഷം ടി. ജെ ജ്ഞാനവേൽ സംവിധാനം ചെയ്യുന്ന ചിത്രം കൂടിയാണ് രജനികാന്തിന്റെ കരിയറിലെ 170-മത് ചിത്രമായ വേട്ടയ്യൻ. ചിത്രത്തിൽ ഒരു പൊലീസ് ഓഫീസറുടെ വേഷത്തിലാണ് രജനി എത്തുന്നത്. ഈ വർഷം ഒക്ടോബറിലാണ് ചിത്രം തിയേറ്ററുകളിൽ എത്തുന്നത്.
33 വർഷത്തിന് ശേഷം രജനികാന്തും അമിതാഭ് ബച്ചനും ഒന്നിക്കുന്ന ചിത്രമെന്ന പ്രത്യേകതയും വേട്ടയ്യനുണ്ട്. മുകുൾ എസ് ആനന്ദ് സംവിധാനം ചെയ്ത് 1991 ൽ പുറത്തിറങ്ങിയ ‘ഹം’ എന്ന ചിത്രത്തിലാണ് അമിതാഭ്- രജനി കൂട്ടുക്കെട്ട് അവസാനമായി ഒന്നിച്ചഭിനയിച്ചത്.
ഫഹദ് ഫാസിൽ, മഞ്ജു വാര്യർ, റാണ ദഗുബാട്ടി, ദുഷാര വിജയൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. ലൈക്ക പ്രൊഡക്ഷൻസിന്റെ ബാനറിൽ സുഭാസ്ക്കരനാണ് ചിത്രത്തിന്റെ നിർമ്മാണം. ബിഗ് ബഡ്ജറ്റിൽ ഒരുങ്ങുന്ന ചിത്രത്തിന് അനിരുദ്ധ് രവിചന്ദറാണ് സംഗീതം നൽകുന്നത്. എസ്. ആർ കതിർ ആണ് ചിത്രത്തിന് വേണ്ടി ഛായാഗ്രഹണം നിർവഹിച്ചിരിക്കുന്നത്.