വിനീത് ശ്രീനിവാസന്റെ സംവിധാനത്തില് എത്തിയ ‘വര്ഷങ്ങള്ക്ക് ശേഷം’ സിനിമ ഒ.ടി.ടിയില് എത്തിയിരിക്കുകയാണ്. ഏപ്രില് 11ന് തിയേറ്ററുകളില് എത്തിയ ചിത്രം സോണി ലിവിലാണ് സ്ട്രീമിംഗ് ആരംഭിച്ചിരിക്കുന്നത്. വര്ഷങ്ങള്ക്ക് ശേഷത്തിന് പിന്നാലെ ജൂണില് രണ്ട് സിനിമകള് കൂടി ഒ.ടി.ടിയിലെത്താന് പോവുകയാണ്.
ടൊവിനോ തോമസ്, ഭാവന എന്നിവരെ പ്രധാന കഥാപാത്രങ്ങളാക്കി ലാല് ജൂനിയര് സംവിധാനം ചെയ്ത ചിത്രം ‘നടികര്’ ജൂണ് 27ന് ഒ.ടി.ടിയില് സ്ട്രീമിംഗ് ആരംഭിക്കും. സിനിമയ്ക്കുള്ളിലെ സിനിമയുടെ കഥ പറഞ്ഞ ചിത്രത്തില് സൂപ്പര്സ്റ്റാര് ഡേവിഡ് പടിക്കല് എന്ന കഥാപാത്രമായാണ് ടൊവിനോ വേഷമിട്ടത്. എന്നാല് 40 കോടി ബജറ്റില് ഒരുക്കിയ ചിത്രം വന് ഫ്ളോപ്പ് ആയിരുന്നു. 5.39 കോടി രൂപ മാത്രമാണ് സിനിമയ്ക്ക് നേടാനായത്. നെറ്റ്ഫ്ളിക്സില് ആണ് ചിത്രം സ്ട്രീം ചെയ്യുക.
ബ്ലെസി-പൃഥ്വിരാജ് കോമ്പോയില് എത്തിയ, ഏറെ ആഘോഷിക്കപ്പെട്ട ചിത്രം ‘ആടുജീവിതം’ ഉടന് ഒ.ടി.ടിയില് സ്ട്രീമിംഗ് ആരംഭിക്കും. ഈ മാസം തന്നെ ചിത്രം നെറ്റ്ഫ്ളിക്സില് സ്ട്രീമിംഗ് ആരംഭിക്കുമെന്നാണ് റിപ്പോര്ട്ട്. എന്നാല് റിലീസ് തീയതി ഔദ്യോഗികമായി ഹോട്ട്സ്റ്റാര് പ്രഖ്യാപിച്ചിട്ടില്ല. 160 കോടി രൂപയാണ് ചിത്രം ആഗോളതലത്തില് നേടിയ കളക്ഷന്.
നിവിന് പോളി, ധ്യാന് ശ്രീനിവാസന്, അനശ്വര രാജന് എന്നിവരെ പ്രധാന കഥാപാത്രമാക്കി ഡിജോ ജോസ് ആന്റണി ഒരുക്കിയ ‘മലയാളി ഫ്രം ഇന്ത്യ’ ഡിസ്നി പ്ലസ് ഹോട്ട് സ്റ്റാറില് റിലീസ് ചെയ്യും. ചിത്രം ഈ മാസം അവസാനത്തോടെ ഒ.ടി.ടിയില് എത്തുമെന്നാണ് റിപ്പോര്ട്ട്. തിരക്കഥ മോഷ്ടിച്ചുവെന്ന ആരോപണത്തെ തുടര്ന്ന് വിവാദത്തിലായ ചിത്രമാണ് മലയാളി ഫ്രം ഇന്ത്യ. 18.37 കോടി രൂപയാണ് ചിത്രം തിയേറ്ററുകളില് നിന്നും നേടിയത്.
ദിലീപിനെ നായകനാക്കി വിനീത് കുമാര് സംവിധാനം ചെയ്ത ‘പവി കെയര് ടേക്കര്’ ഈ മാസം തന്നെ ഒ.ടി.ടിയില് എത്തുമെന്നാണ് റിപ്പോര്ട്ടുകള്. ഗ്രാന്ഡ് പ്രൊഡക്ഷന്സിന്റ ബാനറില് ദിലീപ് നിര്മ്മിച്ച ചിത്രമാണിത്. തിയേറ്ററില് നിന്നും 8.05 കോടി രൂപ മാത്രമാണ് ചിത്രത്തിന് നേടാനായിട്ടുള്ളു.
ഇന്ദ്രജിത്ത് സുകുമാരന്, ശ്രുതി രാമചന്ദ്രന്, സര്ജാനോ ഖാലിദ്, വിന്സി അലോഷ്യസ് എന്നിവരെ കേന്ദ്രകഥാപാത്രങ്ങളാക്കി അരുണ് ബോസ് സംവിധാനം ചെയ്ത ‘മാരിവില്ലിന് ഗോപുരങ്ങള്’ എന്ന ചിത്രം അടുത്ത മാസമാണ് ഒ.ടി.ടിയില് എത്തുക. ജൂലൈ ആദ്യവാരം ചിത്രം ഒ.ടി.ടിയില് എത്തുമെന്നാണ് റിപ്പോര്ട്ട്. മെയ് 10ന് ആയിരുന്നു ചിത്രം തിയേറ്ററുകളില് എത്തിയത്.