വിവിധ ഭാഷകളിലായി വമ്പൻ റിലീസുകൾ അടക്കം നിരവധി ചിത്രങ്ങളാണ് ഈ വർഷം പകുതിയോടെ എത്തിയത്. ജനുവരി മുതൽ ഏപ്രിൽ വരെയുള്ള മാസങ്ങളിലായി 3691 കോടി രൂപ ഇന്ത്യൻ ബോക്സ് ഓഫീസിലേക്ക് എത്തിയതായുള്ള റിപ്പോർട്ടുകളാണ് ഇപ്പോൾ പുറത്തു വരുന്നത്. പ്രമുഖ മീഡിയ കൺസൾട്ടിംഗ് സ്ഥാപനമായ ഓർമാക്സ് മീഡിയ ആണ് പുറത്തു വിട്ടിരിക്കുന്നത്.
കഴിഞ്ഞ വർഷത്തെ കണക്കുകളുമായി താരതമ്യം ചെയ്യുമ്പോൾ ഈ വർഷം ഇന്ത്യൻ ബോക്സ് ഓഫീസിലേക്കെത്തിയ വരുമാനത്തിന് 19 ശതമാനത്തിന്റെ വർധനവാണ് ഉണ്ടായത്. ഈ വർഷത്തെ ഇന്ത്യൻ ബോക്സ് ഓഫീസ് റവന്യൂവിൽ 39 ശതമാനം ബോളിവുഡിൽ നിന്നാണ് എത്തിയിരിക്കുന്നത്. 22 ശതമാനം ഷെയർ തെലുങ്ക് ഇൻഡസ്ട്രിയിൽ നിന്നുള്ളതാണ്. മൂന്നാം സ്ഥാനത്ത് നിൽക്കുന്നത് തമിഴ് ഇൻഡസ്ട്രിയാണ്. തമിഴകത്തിന് 17 ശതമാനമാണ് ഉള്ളത്. മലയാളം ഇൻഡസ്ട്രിക്ക് 13 ശതമാനം ഷെയറാനുള്ളത്.
ഈ വർഷം മലയാളം സിനിമയ്ക്ക് മികച്ച മുന്നേറ്റം നടത്താൻ സാധിച്ചിട്ടുണ്ട് എന്ന് ഓർമാക്സ് മീഡിയയുടെ കണക്കുകളിൽ നിന്നും മനസിലാക്കാൻ സാധിക്കും. തമിഴ് ഇൻഡസ്ട്രിയെക്കാൾ നാല് ശതമാനത്തിന്റെ വ്യത്യാസം മാത്രമാണ് ഇത്തവണ മലയാളത്തിനുള്ളത്. അത് മാത്രമല്ല, കഴിഞ്ഞ വർഷത്തേക്കാളും ഇന്ത്യൻ ബോക്സ് ഓഫീസിൽ മലയാള സിനിമയുടെ ഷെയറും വർധിച്ചിട്ടുണ്ട്. റെക്കോർഡുകൾ സ്വന്തമാക്കിയ എമ്പുരാൻ, തുടരും എന്നീ സിനിമകളുടെ ബോക്സ് ഓഫീസ് പ്രകടനം ഇതിൽ ഗുണം ചെയ്തിട്ടുണ്ട് എന്നാണ് കണക്കുകൾ സൂചിപ്പിക്കുന്നത്.