ആരാധകര് ഏറെ പ്രതീക്ഷയോടെ കാത്തിരിക്കുന്ന ബിഗ് ബജറ്റ് ചിത്രം “മരക്കാര് അറബിക്കടലിന്റെ സിംഹ”ത്തിന്റെ ലൊക്കേഷന് ചിത്രങ്ങള് സോഷ്യല് മീഡിയകളില് വൈറലാകുന്നു. ഹൈദരാബാദിലെ രാമോജി റാവു ഫിലിം സിറ്റിയില് ഒരുങ്ങിയിരിക്കുന്ന പടു കൂറ്റന് സെറ്റുകള് ഹോളിവുഡ് ചിത്രങ്ങളെ ഓര്മിപ്പിക്കുമെന്നാണറിയുന്നത്. യുദ്ധത്തിന്റെയും വിചാരണയുടെയും മറ്റും ലൊക്കേഷന് ചിത്രങ്ങളാണ് പുറത്തുവന്നിരിക്കുന്നത്.
മോഹന്ലാല് പ്രിയദര്ശന് കൂട്ടുകെട്ടിലൊരുങ്ങുന്ന ചിത്രത്തിന്റെ ഷൂട്ടിംഗ് പുരോഗമിക്കുകയാണ്.
വന് താരനിരയാണ് ചിത്രത്തിലുള്ളത് . മോഹന്ലാലിന്റെ കുട്ടിക്കാലം പ്രണവ് മോഹന്ലാല് അവതരിപ്പിക്കുന്നു. കുഞ്ഞാലി മരയ്ക്കാര് ഒന്നാമന്, അഥവാ കുട്ട്യാലി മരയ്ക്കാര് ആയെത്തുന്നത് മധുവാണ്. സുനില് ഷെട്ടിയും ചിത്രത്തിലുണ്ട്. പ്രഭു, മുകേഷ്, സിദ്ദിഖ്, മഞ്ജു വാര്യര്, കല്യാണി പ്രിയദര്ശന്, കീര്ത്തി സുരേഷ്, പൂജ കുമാര്, നെടുമുടി വേണു, ബാബുരാജ്, മാമുക്കോയ, ഗണേഷ് കുമാര് തുടങ്ങിയവരും ചിത്രത്തിലുണ്ട്. “മരക്കാര് അറബിക്കടലിന്റെ സിംഹം” അടുത്ത വര്ഷം തിയേറ്ററുകളിലെത്തും.