അപ്പാനി ശരത്തിനെ നായകനാക്കി വിനോദ് ഗുരുവായൂര് സംവിധാനം ചെയ്യുന്ന “മിഷന് സി” ചിത്രത്തിന്റെ ട്രെയ്ലര് സോഷ്യല് മീഡിയയില് ശ്രദ്ധേയമാകുന്നു. ചേസിംഗ് ബിയോണ്ട് ലിമിറ്റ്സ് എന്നാണ് ചിത്രത്തിന്റെ ടാഗ് ലൈന്. ആക്ഷന് രംഗങ്ങളാണ് ട്രെയ്ലറിലെ ഹൈലൈറ്റ്.
ടെററിസ്റ്റുകള് ബന്ദികളാക്കിയ ഓടിക്കൊണ്ടിരിക്കുന്ന ഒരു ടൂറിസ്റ്റ് ബസ്സും അതില് കുടുങ്ങിപ്പോയ വിദ്യാര്ത്ഥികളും, അവരെ രക്ഷപ്പെടുത്താന് എത്തുന്ന പൊലീസുകാരുടെയും കമന്റോകളുടെയും ഉദ്വേഗം ജനിപ്പിക്കുന്ന നിമിഷങ്ങളിലൂടെയാണ് മിഷന് സി കടന്നു പോകുന്നത്.
മീനാക്ഷി ദിനേശ് ആണ് നായിക. കൈലാഷ്, മേജര് രവി, ജയകൃഷ്ണന്, ബാലാജി ശര്മ്മ എന്നീ താരങ്ങളും 35 ഓളം പുതുമുഖ താരങ്ങളും ചിത്രത്തില് അണിനിരക്കുന്നു. കേരളത്തിലെ ഉന്നത പോലീസ് ഉദ്യോഗസ്ഥരില് പലരും ഇതില് കഥാപാത്രങ്ങള് ആകുന്നു എന്നതും ചിത്രത്തിന്റെ പ്രത്യേകതയാണ്.
ചിത്രത്തിലെ കൂടുതല് ഗാനങ്ങളും രചിച്ചിരിക്കുന്നത് പൊലീസ് ഉദ്യോഗസ്ഥനായ സുനില് ചെറുകടവും സംഗീതം ഒരുക്കിയിരിക്കുന്നത് പൊലീസ് ഉദ്യോഗസ്ഥനായ ഹണിയുമാണ്. എം സ്ക്വയര് സിനിമയുടെ ബാനറില് മുല്ല ഷാജി നിര്മ്മിക്കുന്ന ചിത്രം രാമക്കല്മേടും മൂന്നാറിലുമായാണ് ചിത്രീകരിച്ചിരിക്കുന്നത്.