എഴുത്തുകാരനും മാധ്യമപ്രവര്‍ത്തകനുമായ ജെനിത് കാച്ചപ്പിള്ളി ഒരുക്കുന്ന “മറിയം വന്ന് വിളക്കൂതി”യുടെ പോസ്റ്റര്‍ ശ്രദ്ധയാകര്‍ഷിക്കുന്നു. ശബരീഷ് വര്‍മ്മ, സിജു വിത്സണ്‍, കൃഷ്ണ ശങ്കര്‍, അല്‍ത്താഫ് എന്നിവരാണ് പ്രധാന കഥാപാത്രങ്ങളായി എത്തുന്നത്. ചിത്രത്തിന്റെ പോസ്റ്റര്‍ നടന്‍ ദുല്‍ഖര്‍ സല്‍മാനാണ് ഫെയ്‌സ്ബുക്കിലൂടെ പുറത്തുവിട്ടത്.
“ബ്രില്ല്യന്‍സുകളില്ലാത്ത ചിത്രം” എന്ന ടാഗ്‌ലൈനോടെയാണ് ചിത്രത്തിന്റെ പോസ്റ്റര്‍ ഒരുക്കിയിരിക്കുന്നത്. ഒരു രാത്രിയിലെ മൂന്ന് മണിക്കൂറിന്റെ കഥ പറയുന്ന ചിത്രം കോമഡി ത്രില്ലറായാണ് ഒരുക്കുന്നത്. സിനോജ് അയ്യപ്പന്‍ ഛായാഗ്രഹണം നിര്‍വ്വഹിക്കുന്ന ചിത്രത്തിന് പ്രശാന്ത് പിള്ളയാണ് സംഗീതമൊരുക്കുന്നത്.
എആര്‍കെ മീഡിയയുടെ ബാനറില്‍ രാജേഷ് അഗസ്റ്റിനാണ് ചിത്രം നിര്‍മ്മിക്കുന്നത്. ചിത്രം പൂര്‍ത്തിയാക്കുന്നതിനായുള്ള നിര്‍മ്മാതാവിന്റെ കഷ്ടപാടുകള്‍ നിരത്തി സംവിധായകന്‍ പങ്കുവച്ച കുറിപ്പും ശ്രദ്ധയാകര്‍ഷിച്ചിരുന്നു. സിനിമ തീര്‍ക്കാനായി ഭാര്യയുടെ പേരില്‍ പണയത്തില്‍ ഇരിക്കുന്ന സ്ഥലം പോലും ഈട് എഴുതി കൊടുക്കേണ്ടി വന്ന നിര്‍മാതാവിന്റെ അവസ്ഥയൊക്കെ പറഞ്ഞായിരുന്നു കുറിപ്പ്.