പ്രേക്ഷകര്ക്ക് പിടിതരാതെ ഞെട്ടിച്ച് മമ്മൂട്ടിയുടെ ‘ഭ്രമയുഗം’ ടീസര്. ഭയപ്പെടുത്തുന്ന രീതിയിലാണ് ടീസറിലെ രംഗങ്ങള്. ഹൊറര് ത്രില്ലര് ഗണത്തില് പെടുന്ന ചിത്രം പൂര്ണ്ണമായും ബ്ലാക്ക് ആന്ഡ് വൈറ്റിലാണ് ചിത്രീകരിച്ചത് എന്നാണ് ടീസര് നല്കുന്ന സൂചന. നേരത്തെ പുറത്തുവന്ന പോസ്റ്ററുകള് എല്ലാം ബ്ലാക്ക് ആന്ഡ് വൈറിലാണ് എത്തിയത്.
അര്ജുന് അശോകന്, സിദ്ധാര്ഥ് ഭരതന്, അമാല്ഡ ലിസ്, മണികണ്ഠന് ആചാരി എന്നീ താരങ്ങളും ടീസറില് പ്രത്യക്ഷപ്പെടുന്നുണ്ട്. ക്ലൈമാകസില് കാണിക്കുന്ന മമ്മൂട്ടിയുടെ ദൃശ്യങ്ങളാണ് ടീസറിലെ ഹൈലൈറ്റ്. ഒരു മനയ്ക്കുള്ളില് സംഭവിക്കുന്ന കാര്യങ്ങളാണ് സിനിമ പറയുക എന്നാണ് ടീസറില് നിന്നുള്ള സൂചന.
മമ്മൂട്ടിയുടെ കഥാപാത്രം ഒരു ദുര്മന്ത്രവാദിയാണ്, നാഗങ്ങള്ക്കൊപ്പം ജീവിക്കുന്ന ആളാണ് ഇതെന്നും നേരത്തെ റിപ്പോര്ട്ടുകള് എത്തിയിരുന്നു. ‘ഭൂതകാലം’ എന്ന് ഹിറ്റ് ഹൊറര് ചിത്രത്തിന് ശേഷം രാഹുല് സദാശിവന് സംവിധാനം ചെയ്യുന്ന ചിത്രമാണിത്. ഈ വര്ഷം ഏപ്രിലില് ആയിരിക്കും ചിത്രത്തിന്റെ റിലീസ്.
വൈ നോട്ട് സ്റ്റുഡിയോസിന്റെയും നൈറ്റ് ഷിഫ്റ്റിന്റെയും ബാനറില് രാമചന്ദ്ര ചക്രവര്ത്തിയും ശശി കാന്തും നിര്മ്മിക്കുന്ന ചിത്രത്തില് പ്രശസ്ത മലയാള സാഹിത്യകാരന് ടി. ഡി രാമകൃഷണനാണ് സംഭാഷണങ്ങള് എഴുതുന്നത്. രാഹുല് സദാശിവന് തന്നെയാണ് ചിത്രത്തിന്റെ തിരക്കഥ. ഷെഹ്നാദ് ലാലാണ് ചിത്രത്തിന് വേണ്ടി ഛായാഗ്രഹണം നിര്വഹിച്ചിരിക്കുന്നത്, സംഗീതം ക്രിസ്റ്റോ സേവിയര്.