ഓണത്തിന് ബോക്‌സ് ഓഫീസ് കീഴടക്കാന്‍ മമ്മൂട്ടി എത്തുന്നു. ഡിനോ ഡെന്നിസിന്റെ സംവിധാനത്തില്‍ എത്തുന്ന മമ്മൂട്ടി ചിത്രം ‘ബസൂക്ക’യുടെ ടീസര്‍ പുറത്തുവിട്ടു. വയലന്‍സ് നിറഞ്ഞ ദൃശ്യങ്ങളാണ് ടീസറില്‍ കാണിച്ചിരിക്കുന്നത്. മമ്മൂട്ടിയുടെ ആക്ഷന്‍ രംഗങ്ങളും ടീസറിലുണ്ട്. സ്റ്റൈലിഷ് ആയാണ് താരത്തെ ടീസറില്‍ വീഡിയോയില്‍ അവതരിപ്പിച്ചിരിക്കുന്നത്.
ഗൗതം വാസുദേവ് മേനോനെയും ടീസറില്‍ കാണാം. ബാബു ആന്റണി, ഗായത്രി അയ്യര്‍, നീത പിള്ള, ദിവ്യ പിള്ള, ഷറഫുദ്ദീന്‍, ജഗദീഷ്, സിദ്ധാര്‍ത്ഥ് ഭരതന്‍, ഐശ്വര്യ മേനോന്‍, സ്ഫടികം ജോര്‍ജ്, ഷമ്മി തിലകന്‍ തുടങ്ങി നിരവധി താരങ്ങളാണ് ചിത്രത്തില്‍ വേഷമിടുന്നത്.
മലയാളത്തിലെ എക്കാലത്തെയും മികച്ച തിരക്കഥാകൃത്തുകളില്‍ ഒരാളായ കലൂര്‍ ഡെന്നിസിന്റെ മകനാണ് ചിത്രത്തിന്റെ സംവിധായകനായ ഡിനോ ഡെന്നീസ്. കാപ്പ, അന്വേഷിപ്പിന്‍ കണ്ടെത്തും എന്നിവയ്ക്ക് ശേഷം തീയേറ്റര്‍ ഓഫ് ഡ്രീംസ് നിര്‍മ്മിക്കുന്ന ചിത്രമെന്ന പ്രത്യേകതയും ബസൂക്കയ്ക്ക് ഉണ്ട്.
ബിഗ് ബജറ്റ് ഗെയിം ത്രില്ലറായി ഒരുക്കുന്ന ചിത്രം നിര്‍മ്മിച്ചിരിക്കുന്നത് സരിഗമ ഇന്ത്യ ലിമിറ്റഡും തീയേറ്റര്‍ ഓഫ് ഡ്രീംസിന്റെ ബാനറില്‍ ജിനു വി അബ്രഹാമും, ഡോള്‍വിന്‍ കുര്യാക്കോസും ചേര്‍ന്നാണ്. എക്‌സിക്യൂട്ടീവ് പ്രൊഡ്യൂസര്‍ – സൂരജ് കുമാര്‍, കോ പ്രൊഡ്യൂസര്‍ – സാഹില്‍ ശര്‍മ, ഛായാഗ്രഹണം – നിമിഷ് രവി.