നിയമവിരുദ്ധമായി ഒരു കാര്യം പൃഥ്വിരാജിന് വേണ്ടി ചെയ്‌തു എന്ന് സമൂഹത്തെ കൊണ്ട് പറയിപ്പിക്കുന്നതിനോട് എനിക്ക് യോജിപ്പില്ല'

ജോർദാനിലുള്ള നടൻ പൃഥ്വിരാജും സംഘവും തീർത്തും സുരക്ഷിതർ തന്നെയെന്ന് അമ്മ മല്ലിക സുകുമാരൻ

വർക്ക് നടക്കുന്നില്ല എന്ന ബുദ്ധിമുട്ടല്ലാതെ മോന് വേറെ പ്രശ്‌നങ്ങളൊന്നുമില്ല. നമ്മുടെ അവസ്ഥ പോലെ തന്നെയാണ് അവിടെയും. അങ്ങോട്ടോ ഇങ്ങോട്ടോ യാതൊരുവിധ വാഹന സൗകര്യങ്ങളുമില്ല.

ഞാൻ ഒരു മെസേജ് അയച്ചതിന്റെ അടിസ്ഥാനത്തിൽ കേന്ദ്രമന്ത്രി മുരളീധരൻ സർ വിളിച്ചിരുന്നു. അദ്ദേഹത്തെ അറിയാം എന്നേയുള്ളൂ വലിയ പരിചയമില്ലായിരുന്നു. വിസ സംബന്ധമായോ, താമസ സംബന്ധമായോ, ഭക്ഷണ സംബന്ധമായോ യാതൊരു കുറവും വരാതെ ഞങ്ങൾ എല്ലാ ഏർപ്പാടും ചെയ്‌തിട്ടുണ്ട്. അതിലൊന്നും ഒരു ടെൻഷനും വേണ്ട. എന്നാണോ യാത്ര ചെയ്യാൻ സൗകര്യം കിട്ടുന്നത്, അന്നുവരെ അവർക്ക് ഒരു പ്രശ്‌നവും ഉണ്ടാകാതെ എംബസി വഴി എല്ലാ കാര്യങ്ങളും ചെയ്യും എന്നാണ് അദ്ദേഹം പറഞ്ഞത്.

പ്രത്യേകമായിട്ട് ഒരു പ്ലെയിനിൽ കൊണ്ടുവരുന്നതിനെ കുറിച്ച് ചോദിച്ചിരുന്നു. സ്വാഭാവികമായിട്ടും അത് ശരിയല്ല എന്ന അഭിപ്രായമാണ് ഞാൻ പറഞ്ഞത്. പലയിടങ്ങളിലും നിരവധിപേർ കുടുങ്ങി കിടക്കുകയാണ്. നിയമവിരുദ്ധമായി ഒരു കാര്യം പൃഥ്വിരാജിന് വേണ്ടി ചെയ്‌തു എന്നു നാളെ സമൂഹത്തെ കൊണ്ട് പറയിപ്പിക്കുന്നതിനോട് എനിക്ക് യോജിപ്പില്ല”-മല്ലിക സുകുമാരൻ കൂട്ടിച്ചേർത്തു.