മോഹന്ലാലിന്റെ ഗ്രാന്ഡ് എന്ട്രിക്ക് വേണ്ടി കാത്തിരിക്കുകയാണ് പ്രേക്ഷകര്. ‘ജയിലര്’ ചിത്രത്തിലെ മോഹന്ലാലിന്റെ കാമിയോ റോള് ഏറ കൈയ്യടി നേടിയിരുന്നു. അതുകൊണ്ട് ജയിലറിനേക്കാള് മാസ് ആകും ‘മലൈകോട്ടൈ വാലിബന്’ എന്നാണ് പ്രതീക്ഷകള്. ലിജോ ജോസ് പെല്ലിശേരി ഒരുക്കുന്ന ചിത്രത്തിന് പ്രഖ്യാപനം മുതലേ ഹൈപ്പ് ലഭിച്ചിരുന്നു.
വാലിബനിലെ മോഹന്ലാലിന്റെ ലുക്കും ഗ്ലിംപ്സ് വീഡിയോയുമെല്ലാം ശ്രദ്ധ നേടിയിരുന്നു. സിനിമയുടെ റിലീസുമായി ബന്ധപ്പെട്ട ചര്ച്ചകളാണ് ഇപ്പോള് സോഷ്യല് മീഡിയയില് നടന്നു കൊണ്ടിരിക്കുന്നത്. തിയേറ്ററില് നിന്നുള്ള വിവരങ്ങള് അനുസരിച്ച് വാലിബന്റെ റിലീസ് ഡിസംബറില് ഉണ്ടാകുമെന്നാണ് പ്രതീക്ഷിക്കുന്നത്.
ക്രിസ്മസ് റിലീസ് ആയി ചിത്രം തിയേറ്ററുകളില് എത്താനാണ് സാധ്യത. എന്നാല് പോസ്റ്റ് പ്രൊഡക്ഷനിലുള്ള ചിത്രത്തിന്റെ മറ്റ് ഡീറ്റെയ്ലുകളൊന്നും പുറത്തു വന്നിട്ടില്ല. ‘ലൂസിഫറി’ന് ശേഷം മോഹന്ലാലിന്റെ തിരിച്ചുവരവ് അടയാളപ്പെടുത്തുന്നതാകും വാലിബന് എന്ന പ്രതീക്ഷയിലാണ് പ്രേക്ഷകര്.
മാസ് സിനിമ വേണ്ടവര് അങ്ങനെ കാണാം. സീരിയസ് ആയി കാണേണ്ടവര്ക്ക് അങ്ങനെ കാണാം എന്നാണ് മോഹന്ലാല് സിനിമയെ കുറിച്ച് പ്രതികരിച്ചത്. ഇത്ര വലിയ കാന്വാസിലുള്ള സിനിമ ലിജോ ഏറ്റവും ഭംഗിയായി കൈകാര്യം ചെയ്തു. ബാക്കിയെല്ലാം പ്രേക്ഷകര് തീരുമാനിക്കട്ടെ എന്നാണ് മോഹന്ലാല് ഒരു അഭിമുഖത്തില് പറഞ്ഞിരുന്നു.
ജോണ് മേരി ക്രിയേറ്റിവിന്റെ ബാനറില് ഷിബു ബേബി ജോണ്, സെഞ്ച്വറി ഫിലിംസിന്റെ ബാനറില് കൊച്ചുമോന്, മാക്സ് ലാബിന്റെ അനൂപ് എന്നിവര് ചേര്ന്നാണ് മലൈക്കോട്ടൈ വാലിബന് നിര്മ്മിക്കുന്നത്. രാജസ്ഥാനില് ആയിരുന്നു ചിത്രത്തിന്റെ ആദ്യ ഷെഡ്യൂള്.