യേശുദാസ് ഏറ്റവും കൂടുതല്‍ പാടിയ രാഗം ഏതാണെന്ന് അറിയുമോ? ഏത് വര്‍ഷമാണ് 234 സിനിമാ ഗാനങ്ങള്‍ ദാസേട്ടന്‍ പാടിയതെന്ന് അറിയാമോ? മലയാളത്തിന്റെ ഗാനഗന്ധര്‍വ്വന്‍ കെ.ജെ യേശുദാസ് ഇന്ന് 82-ാം ജന്മദിനം ആഘോഷിക്കുകയാണ്. ഏതു പ്രായത്തിലുള്ളവരേയും പിടിച്ചിരുത്തുന്ന ഗാനഗന്ധര്‍വ്വന്റെ ശബ്ദത്തെ സ്നേഹിക്കാത്ത മലയാളികളില്ല. പലകാലങ്ങള്‍, ഒരേ ഒരു ശബ്ദം. മറ്റുള്ളവരില്‍ നിന്ന് യേശുദാസിനെ വ്യത്യസ്തനാക്കുന്നത് എന്താണെന്ന് ചോദിച്ചാല്‍ യേശുദാസ് ഒന്നേയുള്ളൂ എന്ന് മാത്രമായിരിക്കും ഉത്തരം. യേശുദാസിന്റെ 83-ാം ജന്മദിനത്തില്‍ അദ്ദേഹത്തെ കുറിച്ചുള്ള കൗതുകകരമായ ചില കാര്യങ്ങള്‍ ഇവയൊക്കെയാണ്.
ഏത് സംഗീത സംവിധായകന്റെ ഗാനങ്ങളാണ് യേശുദാസ് ഏറ്റവും കൂടുതല്‍ പാടിയത് എന്ന് അറിയാമോ? ദേവരാജന്‍ മാസ്റ്ററുടെത്. ദേവരാജന്‍ മാസ്റ്റര്‍ ഈണമിട്ട 654 ഗാനങ്ങള്‍ യേശുദാസ് ആലപിച്ചിട്ടുണ്ട്. രണ്ടാമത് രവീന്ദ്രന്‍ മാസ്റ്റര്‍ സംഗീതം ഒരുക്കിയ 339 ഗാനങ്ങള്‍.
ഗാനരചയിതാക്കളില്‍ ശ്രീകുമാരന്‍ തമ്പിയുടെ സിനിമാ ഗാനങ്ങളാണ് യേശുദാസ് കൂടുതല്‍ പാടിയിട്ടുള്ളത്. 501 ഗാനങ്ങള്‍ ആലപിച്ചിട്ടുണ്ട്. വയലാറിന്റെ 445 ഗാനങ്ങള്‍ പാടിയിട്ടുണ്ട്. തൊട്ട് താഴെ പി ഭാസ്‌ക്കരന്‍, കൈതപ്രം, ബിച്ചു തിരുമല, പൂവച്ചല്‍ ഖാദര്‍, ഒഎന്‍വി, ഗിരീഷ് പുത്തഞ്ചേരി, യൂസഫലി കേച്ചേരി എന്നിവരുടെ ഗാനങ്ങള്‍.
സിനിമാ ഗാനങ്ങളില്‍ യേശുദാസ് കൂടുതല്‍ പാടിയ രാഗം മോഹനം ആണ്.
യേശുദാസ് സംഗീതം നല്‍കി 49 ഗാനങ്ങള്‍ എത്തിയിട്ടുണ്ട്. കൂടുതലും വയലാറിന്റെയും ശ്രീകുമാരന്‍ തമ്പിയുടെയും ഗാനങ്ങളാണ്.
1982 എന്ന വര്‍ഷം 234 സിനിമാ ഗാനങ്ങളാണ് യേശുദാസ് പാടിയത്.
പന്ത്രണ്ട് സിനിമകളില്‍ യേശുദാസ് അഭിനയിച്ചിട്ടുണ്ട്. 1965 -ല്‍ ‘കാവ്യമേള’ എന്ന സിനിമയില്‍ ആയിരുന്നു ആദ്യം മുഖം കാണിച്ചത്. ‘സ്വപ്നങ്ങളേ നിങ്ങള്‍ സ്വര്‍ഗ്ഗകുമാരികളല്ലോ’ എന്ന ഗാനം സ്റ്റേജില്‍ വന്ന് പാടുന്നവരുടെ കൂട്ടത്തില്‍ യേശുദാസ് അനുപല്ലവി പാടുന്നതായാണ് സിനിമയില്‍.
സിനിമേതര ഗാനങ്ങളില്‍ ആലപ്പി രംഗനാഥിന്റെ സംഗീത സംവിധാനത്തിലാണ് കൂടുതല്‍ പാട്ടുകള്‍ പാടിയിട്ടുള്ളത്. 136 ഗാനങ്ങള്‍ ആലപിച്ചിട്ടുണ്ട്. ലളിത ഗാനരചയിതാവ് എസ് രമേശന്‍ നായരുടെ 93 ഗാനങ്ങളും ആലപിച്ചിട്ടുണ്ട്.
1997ല്‍ തരംഗിണി പുറത്തിറക്കിയ സ്‌നേഹാര്‍ച്ചന എന്ന ക്രിസ്ത്യന്‍ സംഗീത ആല്‍ബത്തിന് വേണ്ടി യേശുദാസ് ഒരു ക്രിസ്ത്യന്‍ ഭക്തിഗാനം എഴുതിയിട്ടുണ്ട്. ‘ബത്ലേഹം തൊഴുത്തില്‍’ എന്ന് തുടങ്ങുന്ന ആ ഗാനത്തിന് സംഗീതം പകര്‍ന്നതും പാടിയതും യേശുദാസ് തന്നെയാണ്.
‘സ്വാമിയെന്‍ നാദത്തിന്‍ ഉറവിടമേ’, ‘പുള്ളോന്റെ പാട്ടുകള്‍’ എന്നീ ഹിന്ദു ഭക്തിഗാനങ്ങള്‍ യേശുദാസ് എഴുതി, സംഗീതം നല്‍കി ആലപിച്ചവയാണ്. 2006ലെ തരംഗിണി ആല്‍ബമായ കാണിപ്പൊന്ന് അയ്യപ്പഗാനങ്ങളിലാണ് ഇവ രണ്ടും.
റിലീസാകാന്‍ ഇരിക്കുന്ന ’14ത് ഫെബ്രുവരി’ എന്ന സിനിമയ്ക്ക് വേണ്ടി പാടിയ ‘അരികില്‍ നീ തണലായ് ഞാന്‍’ എന്ന ഗാനമാണ് യേശുദാസിന്റെതായി ഒടുവില്‍ റിലീസ് ചെയ്ത സിനിമാഗാനം. യേശുദാസിന്റെ പുതിയ ആല്‍ബം ‘തനിച്ചൊന്ന് കാണാന്‍’ ഇന്ന് കൊച്ചിയില്‍ മമ്മൂട്ടി പ്രകാശനം ചെയ്യും.
മലയാളം കൂടാതെ തമിഴ്, കന്നഡ, തെലുങ്ക്, ഹിന്ദി, ഒഡിയ, ബംഗാളി, മറാത്തി, അറബിക്, ഇംഗ്ലീഷ്, ലാറ്റിന്‍, റഷ്യന്‍ തുടങ്ങിയ ഭാഷകളില്‍ എല്ലാം യേശുദാസ് പാടിയിട്ടുണ്ട്.