വിജയ് ആരാധകര് ഏറെ കാത്തിരിക്കുന്ന ചിത്രം ലിയോയുടെ സെന്സറിങ് പൂര്ത്തിയായി. ലോകേഷ് കനകരാജ് സംവിധാനം ചെയ്യുന്ന ചിത്രത്തിന് യുഎ സര്ട്ടിഫിക്കറ്റ് ആണ് ലഭിച്ചത്. ചിത്രത്തിന്റെ സംഗീതം അനിരുദ്ധ് രവിചന്ദറിന്റേതാണ്. റിലീസ് ചെയ്ത രണ്ട് ലിറിക് വീഡിയോയും ഇതോടകം ആരാധകര് ഏറ്റെടുത്ത് കഴിഞ്ഞു. ലിയോയുടെ ഓരോ അപ്ഡേറ്റും സാമൂഹ്യ മാധ്യമങ്ങളില് തരംഗം സൃഷ്ടിക്കുന്നുണ്ട്.
ലിയോയുടെ ട്രെയിലര് വ്യാഴാഴ്ച പ്രേക്ഷകരിലേക്കെത്തും. ലോകേഷ് കനകരാജ് രചനയും സംവിധാനവും നിര്വ്വഹിച്ച ലിയോ സെവന് സ്ക്രീന് സ്റ്റുഡിയോയാണ് നിര്മ്മിക്കുന്നത്. ശ്രീ ഗോകുലം മൂവീസിന് വേണ്ടി ഗോകുലം ഗോപാലനാണ് ചിത്രത്തിന്റെ കേരളത്തിലെ വിതരണാവകാശം സ്വന്തമാക്കിയത്. ലിയോയുടെ ഓഡിയോ റിലീസ് ചടങ്ങ് ഈ വര്ഷം ഏറ്റവും കൂടുതല് കാത്തിരുന്ന ഇവന്റുകളില് ഒന്നായിരുന്നു. എന്നാല് സുരക്ഷാ പ്രശ്നങ്ങള് ചൂണ്ടിക്കാട്ടി അണിയറപ്രവര്ത്തകര് പരിപാടി വേണ്ടെന്ന് വയ്ക്കുകയായിരുന്നു.
ഇത് രാഷ്ട്രീയ വിവാദമായിരുന്നു. ഉദയനിധി സ്റ്റാലിന്റെ റെഡ് ജയന്റ് മൂവീസ് ആണ് ഇതിന് പിന്നില് എന്ന രീതിയിലാണ് പ്രചാരണങ്ങള് നടന്നത്.
തൃഷ, സഞ്ജയ് ദത്ത്, അര്ജുന് സര്ജ, പ്രിയ ആനന്ദ്, മിഷ്കിന്, ഗൗതം വാസുദേവ് മേനോന്, മന്സൂര് അലി ഖാന്, സാന്ഡി മാസ്റ്റര്, മാത്യു തോമസ് തുടങ്ങിയവര് സിനിമയുടെ ഭാഗമാണ്. ലോകേഷ് സിനിമാറ്റിക് യൂണിവേഴ്സിന്റെ ഭാഗമാകും ലിയോയും എന്ന പ്രതീക്ഷയിലാണ് സിനിമാപ്രേമികള്.