കമല്‍ഹാസന്റെ രാഷ്ട്രീയ പ്രവേശനത്തിന് എല്ലാ ഭാവുകങ്ങളും നേര്‍ന്ന് സൂപ്പര്‍സ്റ്റാര്‍ രജനീകാന്ത്. ഇന്ന് മാധ്യമങ്ങളുമായി നടത്തിയ കൂടിക്കാഴ്ച്ചയിലാണ് അദ്ദേഹം ഇക്കാര്യം പറഞ്ഞത്. രജനീകാന്തും കമല്‍ഹാസനും രാഷ്ട്രീയത്തില്‍ ഒന്നിക്കുമോ എന്ന മാധ്യമ പ്രവര്‍ത്തകരുടെ ചോദ്യത്തിന് കാലത്തിന് മാത്രമെ അതിന് ഉത്തരം നല്‍കാന്‍ സാധിക്കുകയുള്ളു നമുക്ക് കാത്തിരുന്ന് കാണാം എന്നായിരുന്നു രജനീകാന്ത് മറുപടി നല്‍കിയത്.
കമല്‍ഹാസന്‍ ഇന്നലെ രാഷ്ട്രീയ പ്രവേശന പ്രഖ്യാപനം ഔദ്യോഗികമായി നടത്തിയതിന് പിന്നാലെയാണ് ഇരുവരും ഒരുമിച്ച് ഒറ്റ കക്ഷിയായി മുന്നോട്ടുപോകുന്നുവെന്ന തരത്തില്‍ അഭ്യൂഹങ്ങള്‍ പ്രചരിച്ചു തുടങ്ങിയത്. ഇതിന് ആക്കം കൂട്ടുന്ന തരത്തിലുള്ള പ്രസ്താവനയാണ് ഇപ്പോള്‍ രജനീകാന്ത് നടത്തിയിരിക്കുന്നത്.
എന്നാല്‍, ഇരുവരും ഒന്നിച്ചുള്ള രാഷ്ട്രീയ പ്രവര്‍ത്തനം സാധ്യമാകില്ലെന്നാണ് രാഷ്ട്രീയ നിരീക്ഷകരുടെ പക്ഷം. രജനീകാന്ത് പറഞ്ഞത് സ്പിരിച്വല്‍ പൊളിറ്റിക്ക്‌സിന് ഊന്നല്‍ നല്‍കുമെന്നാണ്. കമല്‍ഹാസന്‍ ആണെങ്കില്‍ അറിയപ്പെടുന്ന നിരീശ്വരവാദിയും. അടിസ്ഥാനപരമായ തത്വശാസ്ത്രങ്ങളില്‍ തന്നെ വിഭിന്ന മുഖങ്ങളില്‍നില്‍ക്കുന്നവര്‍ തമ്മില്‍ രാഷ്ട്രീയത്തില്‍ യോജിക്കാന്‍ സാധിക്കില്ലെന്നാണ് നിരീക്ഷകരുടെ പക്ഷം.