കജോളും പ്രഭു ദേവയും മൂന്ന് പതിറ്റാണ്ടുകൾക്ക് ശേഷം വീണ്ടും ഒന്നിക്കുന്നു!

മൂന്ന് പതിറ്റാണ്ടുകൾക്ക് ശേഷം വീണ്ടും ഒന്നിച്ച് പ്രഭു ദേവയും കജോളും. ചരൺ തേജ് ഉപ്പലപതിയുടെ ആദ്യ സംവിധാന സംരഭത്തിലാണ് ഇരുവരും ഒന്നിക്കുന്നത്. നിരവധി സിനിമാ പ്രേമികളാണ് പ്രഭു ദേവയും കജോളും വീണ്ടും ഒരു സിനിമയ്ക്കായി ഒന്നിക്കുന്നത് കാണാൻ ആഗ്രഹിക്കുന്നതെന്നും സ്‌ക്രീനിൽ ഇരുവരെയും തിരികെ കൊണ്ടുവരുന്നതിൽ ഏറെ സന്തോഷമുണ്ടെന്നും സംവിധായകൻ ചരൺ പറഞ്ഞു.

പാൻ ഇന്ത്യൻ സിനിമയായാണ് ചിത്രം ഒരുക്കാൻ ആലോചിക്കുന്നത്. നസീറുദ്ദീൻ ഷാ, സംയുക്ത മേനോൻ, അദിത്യ സീൽ, ജിഷു സെംഗുപ്ത, കാൻ താരം ഛായ കദം എന്നിവരും ചിത്രത്തിൽ പ്രധാന വേഷത്തിലെത്തുമെന്നാണ് റിപോർട്ടുകൾ.

മിൻസാര കനവ് എന്ന ചിത്രം തെലുങ്കിലും റിമേക്ക് ചെയ്ത സിനിമയാണ്. സിനിമയിലെ ‘വെണ്ണിലവെ വെണ്ണിലവെ എന്ന ഗാനത്തിന് ഇപ്പോഴും വലിയ ഫാൻസ് ഉണ്ട്. കജോളിന്റെ വലിയ ആരാധകൻ കൂടിയാണ് ഞാൻ. കുഛ് കുഛ് ഹോത്ത ഹെ, ദിൽവലെ ദുൽഹനിയ ലേ ജായേംഗെ തുടങ്ങിയ സിനിമകളെല്ലാം എനിക്ക് ഇഷ്ടമാണ് എന്നും അദ്ദേഹം വ്യക്തമാക്കി.

‘മിൻസാര കനവ്’ എന്ന സൂപ്പർഹിറ്റ് ചിത്രത്തിലൂടെ തമിഴ് പ്രേക്ഷകരുടെ ഇടയിൽ ശ്രദ്ധേയമായ ജോഡികളാണ് കജോളും പ്രഭു ദേവയും. ഇരുവരുടെയും ചിത്രത്തിനായി കാത്തിരിക്കുകയാണ് ആരാധകർ.