കമല്‍ഹാസനും സംവിധായകന്‍ ലോകേഷ് കനകരാജും ഒന്നിക്കുന്ന “വിക്രം” ചിത്രത്തില്‍ വില്ലന്‍ വേഷത്തില്‍ മലയാളി താരം ഫഹദ് ഫാസില്‍ എത്തുമെന്ന് റിപ്പോര്‍ട്ടുകള്‍. തമിഴിലെ പ്രമുഖ മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. എന്നാല്‍ ഫഹദിന്റെ ഭാഗത്തു നിന്നും ഇതുവരെ പ്രതികരണങ്ങള്‍ ഒന്നുമുണ്ടായിട്ടില്ല.
കമല്‍ഹാസന്‍ന്റെ 232ാമത് സിനിമയും ലോകേഷിന്റെ അഞ്ചാമത്തെ സിനിമയുമാണ് വിക്രം. ഗ്യാംഗ്സ്റ്റര് മൂവിയായാണ് സിനിമ ഒരുങ്ങുന്നത്. കമലിന്റെ പിറന്നാള്‍ ദിനത്തില്‍ നവംബറില്‍ ചിത്രത്തിന്റെ ടീസര്‍ പുറത്തെത്തിയിരുന്നു. നിഗൂഢമായ കഥാപാത്രമായാണ് ടീസറില്‍ കമല്‍ പ്രത്യക്ഷപ്പെട്ടത്. കമല്‍ഹാസന്റെ നിര്‍മ്മാണ കമ്പനിയായ രാജ്കമല്‍ ഫിലിംസ് ആണ് ചിത്രം നിര്‍മ്മിക്കുന്നത്.
അനിരുദ്ധ് രവിചന്ദറാണ് സംഗീതം ഒരുക്കുന്നത്. അടുത്ത വര്‍ഷമാണ് സിനിമ പ്രദര്‍ശനത്തിനെത്തുക. വിക്രം എന്ന പേരില്‍ 1986-ല്‍ കമല്‍ഹാസന്റെ മറ്റൊരു ചിത്രം റിലീസ് ചെയ്തിട്ടുണ്ട്. അന്നത്തെ ബിഗ് ബജറ്റ് ചിത്രങ്ങളിലൊന്നായ സിനിമ കമലിന്റെ സൂപ്പര്‍ ഹിറ്റുകളിലൊന്നാണ്. അതേസമയം, വിജയ് നായകനായ മാസ്റ്റര്‍ ആണ് ലോകേഷ് കനകരാജിന്റെതായി റിലീസിന് ഒരുങ്ങുന്നത്.
കോവിഡ് പ്രതിസന്ധികള്‍ക്കിടെ റിലീസ് മാറ്റിവെച്ചിരിക്കുകയാണ്. കാര്‍ത്തിയെ നായകനാക്കി ഒരുക്കിയ കൈദി എന്ന ചിത്രത്തിലൂടെയാണ് ലോകേഷ് ശ്രദ്ധേയനായത്. ചിത്രം 100 കോടി ക്ലബ്ബില്‍ ഇടം പിടിച്ചിരുന്നു. കൈദിയുടെ രണ്ടാം ഭാഗം ഒരുക്കുമെന്ന റിപ്പോര്‍ട്ടുകളുമുണ്ട്.