റെക്കോർഡുകൾ തകർത്താണ് മോഹൻലാൽ-തരുൺ മൂർത്തി ചിത്രം ‘തുടരും’ തിയേറ്ററുകളിൽ തുടരുന്നതിനിടെയാണ് സിനിമ ഒടിടിയിൽ എത്തിയത്. എന്നാൽ ഒടിടിയിൽ എത്തിയതിന് ശേഷവും തിയേറ്ററിൽ മികച്ച ബുക്കിങ് ലഭിക്കുന്നു എന്ന റിപോർട്ടൻ ഇപ്പോൾ പുറത്തുവരുന്നത്.
പല തിയേറ്ററുകളിലും നിറഞ്ഞ സദസ്സോടെയായിരുന്നു പ്രദർശനം നടത്തിയത്. ഞായറാഴ്ച ദിവസമായ ഇന്നലെയും മികച്ച ബുക്കിങ്ങാണ് ലഭിച്ചത്. ഒടിടി റിലീസിനെത്തുടർന്ന് സിനിമ ചില തിയേറ്ററുകളിൽ നിന്നും പിൻവലിച്ചിരുന്നു. അതുകൊണ്ടുതന്നെ വളരെ കുറച്ച് തിയേറ്ററുകളിൽ മാത്രമാണ് ഷോ ഉള്ളത്.
അതേസമയം, ഏപ്രിൽ 25ന് തിയേറ്ററുകളിലെത്തിയ തുടരും ആഗോളതലത്തിൽ 230 കോടിയിലധികം രൂപയാണ് നേടിയിട്ടുള്ളത്. കേരളത്തിൽ നിന്ന് മാത്രം 100 കോടിയിലധികമാണ് സിനിമയുടെ കളക്ഷൻ. കേരളാ ബോക്സ് ഓഫീസിൽ നിന്ന് 100 കോടി കളക്ട് ചെയ്യുന്ന ആദ്യ മലയാളം സിനിമ കൂടിയാണ് തുടരും.
ശോഭന നായികയായി എത്തിയ ചിത്രത്തിൽ വിന്റേജ് ലാലേട്ടനെ കാണാൻ കഴിഞ്ഞു എന്നാണ് പ്രേക്ഷകരുടെ അഭിപ്രായം. പ്രകാശ് വർമ, ബിനു പപ്പു, ഫർഹാൻ ഫാസിൽ, മണിയൻപിള്ള രാജു, തോമസ് മാത്യു, ഇർഷാദ് എന്നിവരാണ് ചിത്രത്തിൽ മറ്റ് പ്രധാന വേഷങ്ങളിൽ എത്തിയത്. നിരവധി പുതുമുഖങ്ങളും ചിത്രത്തിൽ വേഷമിട്ടിട്ടുണ്ട്.