സിനിമാ സംഘടനകളില് പോര് രൂക്ഷമാകുന്നതാണ് മലയാള സിനിമ മേഖലയിൽ ചർച്ചയാകുന്നത്. ജൂണ് ഒന്ന് മുതല് സിനിമാ സമരം പ്രഖ്യാപിച്ച നിര്മ്മാതാവ് ജി സുരേഷ് കുമാറിനെതിരെ നിര്മ്മാതാവ് ആന്റണി പെരുമ്പാവൂര് രംഗത്തെത്തിയതും മലയാള സിനിമയില് പുതിയ പോരിന് തുടക്കമിട്ടിരിക്കുകയാണ്.
ആന്റണി പെരുമ്പാവൂരിന്റെ ഫെയ്സ്ബുക്ക് പോസ്റ്റിന് പിന്നാലെ തനിക്കും കുടുംബത്തിനുമെതിരെ സൈബര് ആക്രമണം നടക്കുന്നുവെന്ന് പറയുകയാണ് നിര്മാതാവ് ജി. സുരേഷ് കുമാര്. ചില അസോസിയേഷനുകളും ഫാന്സ് ഗ്രൂപ്പുകളും ടാര്ഗെറ്റ് ചെയ്ത് സൈബര് ആക്രമണം നടത്തിയെന്നും അദ്ദേഹം വ്യക്തമാക്കി.
സംയുക്ത യോഗത്തിലെ തീരുമാനമാണ് വാര്ത്താസമ്മേളത്തില് പറഞ്ഞത്. സമരപ്രഖ്യാപനം യോഗമെടുത്ത തീരുമാനമാണ്. പറഞ്ഞതില് ഉറച്ചുനില്ക്കുന്നു. ഒത്തുതീര്പ്പ് ചര്ച്ച ഉടനുണ്ടാകില്ല. കളക്ഷന് കണക്ക് പറഞ്ഞതാണ് പലരുടേയും പ്രകോപനത്തിന് കാരണമെന്നും സുരേഷ് കുമാര് കൂട്ടിച്ചേര്ത്തു.
സിനിമാ മേഖല ജൂണ് ഒന്ന് മുതല് നിശ്ചലമാകുമെന്ന് പ്രഖ്യാപിച്ചുകൊണ്ട് സുരേഷ് കുമാര് നടത്തിയ വാര്ത്താ സമ്മേളനമാണ് വലിയ ചര്ച്ചകള്ക്ക് തുടക്കമിട്ടത്. സംഘടനയില് ചര്ച്ച ചെയ്തെടുത്ത തീരുമാനമാണ് സുരേഷ് കുമാര് വാര്ത്താസമ്മേളനത്തില് പറഞ്ഞത്. എന്നാല് ഇതിനെ വിമര്ശിച്ച് ആന്റണി പെരുമ്പാവൂര് ഫെയ്സ്ബുക്കില് കുറിപ്പ് പങ്കുവെയ്ക്കുകയായിരുന്നു.