ചിയാന്‍ വിക്രത്തിന്റെ നിരവധി ചിത്രങ്ങള്‍ കേരള ബോക്‌സ് ഓഫീസില്‍ മികച്ച സ്വീകാര്യത നേടിയിട്ടുണ്ട്. ഇപ്പോഴിതാ പുതിയ ചിത്രം കോബ്രയുടെ റിലീസ്ദിന കേരള കളക്ഷന്‍ റിപ്പോര്‍ട്ടുകളും പുറത്തുവന്നിരിക്കുകയാണ്.
ചിത്രം 1.14 കോടി മുതല്‍ 1.60 കോടി വരെ ആദ്യദിനം കേരളത്തില്‍ നിന്ന് നേടിയെന്നാണ് വിവിധ ബോക്‌സ് ഓഫീസ് ട്രാക്കര്‍മാര്‍ പറയുന്നത്. മികച്ച കളക്ഷനാണ് ഇത്. 1.25 കോടി ഒരു വിക്രം ചിത്രം നേടുന്ന ഏറ്റവും ഉയര്‍ന്ന രണ്ടാമത്തെ കേരള ഓപണിംഗ് ആവും.
ഷങ്കറിന്റെ ഐ ആണ് ഒന്നാം സ്ഥാനത്ത്. ഈ വര്‍ഷത്തെ തമിഴ് റിലീസുകളില്‍ കേരളത്തിലെ മൂന്നാമത്തെ ഏറ്റവും മികച്ച ഓപണിംഗുമാണ് കോബ്ര നേടിയതെന്നാണ് ട്രാക്കര്‍മാര്‍ പറയുന്നത്. വിജയ് നായകനായ ബീസ്റ്റ്, കമല്‍ ഹാസന്റെ വിക്രം എന്നിവയാണ് ആദ്യ രണ്ട് സ്ഥാനങ്ങളില്‍. ബീസ്റ്റ് 6.6 കോടിയും വിക്രം 5.02 കോടിയുമാണ് നേടിയത്.
അഡ്വാന്‍സ് ബുക്കിംഗിലും മികച്ച പ്രതികരണമാണ് ചിത്രം കേരളത്തില്‍ നേടിയത്. റിലീസിനു തലേന്ന് ചിത്രം 70 ലക്ഷമാണ് കേരളത്തില്‍ നിന്ന് നേടിയിരിക്കുന്നതെന്ന് ബോക്‌സ് ഓഫീസ് ട്രാക്കര്‍മാരായ സിനിട്രാക്ക് റിപ്പോര്‍ട്ട് ചെയ്തിരിക്കുന്നു. 212 തിയേറ്ററുകളിലെ 1003 ഷോകള്‍ ട്രാക്ക് ചെയ്തതില്‍ നിന്ന് ലഭ്യമായ തുകയാണ് ഇത്.
