മലയാളത്തിലെ സൂപ്പര് ഹിറ്റ് ചിത്രം “ലൂസിഫറി”ന്റെ തെലുങ്ക് റീമേക്കിനെ കുറിച്ചുള്ള പുതിയ വിവരങ്ങളാണ് വീണ്ടും വാര്ത്തകളില് ഇടം നേടുന്നത്. പ്രഭാസ് ചിത്രം “സാഹോ” ഒരുക്കിയ സംവിധായകന് സുജീത്ത് ആണ് തെലുങ്ക് ലൂസിഫര് സംവിധാനം ചെയ്യുന്നത് എന്നാണ് റിപ്പോര്ട്ടുകള് പ്രചരിച്ചിരുന്നത്. എന്നാല് സുജീത്തിനെ ചിത്രത്തില് നിന്നും നീക്കിയതായുള്ള വിവരങ്ങളാണ് ഇപ്പോള് പുറത്തുവരുന്നത്.
മുരളി ഗോപി ഒരുക്കിയ തിരക്കഥയില് മാറ്റങ്ങള് വരുത്തിയാണ് തെലുങ്കില് ലൂസിഫര് ഒരുക്കുക. എന്നാല് സുജീത്ത് ഒരുക്കിയ തിരക്കഥയില് ചിരഞ്ജീവി ഒട്ടും തൃപ്തനല്ല. അതിനാല് സുജീത്തിനെ മാറ്റി സംവിധായകന് വി.വി വിനായകിനെ സംവിധായകന് ആക്കാനാണ് ചിരഞ്ജീവിയുടെ പ്ലാന് എന്നാണ്
പിങ്ക്വില്ല റിപ്പോര്ട്ടു ചെയ്യുന്നത്.
തെലുങ്ക് റീമേക്കില് വില്ലന് വേഷത്തില് നടന് റഹമാന് എത്തുമെന്നും റിപ്പോര്ട്ടുകള് വന്നിരുന്നു. വിവേക് ഓബ്റോയ് അവതരിപ്പിച്ച ബോബി എന്ന കഥാപാത്രത്തെയാണ് റഹമാന് അവതരിപ്പിക്കുക എന്നാണ് സൂചനകള്. മെഗാസ്റ്റാര് ചിരഞ്ജീവി നായകനാകുന്ന ചിത്രത്തില് മഞ്ജു വാര്യര് അവതരിപ്പിച്ച പ്രിയദര്ശിനി രാംദാസ് എന്ന കഥാപാത്രമായി നടി സുഹാസിനി എത്തുമെന്നും റിപ്പോര്ട്ടുകളുണ്ട്.
അതേസമയം, ടൊവിനോ അവതരിപ്പിച്ച ജതിന് രാം ആയി വിജയ് ദേവര്കൊണ്ട വേഷമിടുമെന്നും റിപ്പോര്ട്ടുകളുണ്ട്. ലൂസിഫറില് അതിഥി താരമായാണ് പൃഥ്വിരാജ് വേഷമിട്ടത്. ഈ റോളില് റാണാ ദഗുബതി എത്തുമെന്നും റിപ്പോര്ട്ടുകളുണ്ട്. എന്നാല് തെലുങ്ക് റീമേക്കില് ഏതൊക്കെ താരങ്ങള് വേഷമിടുമെന്ന കാര്യത്തില് ഇതുവരെ ഔദ്യോഗിക സ്ഥിരീകരണം ഒന്നുമുണ്ടായിട്ടില്ല. ഉടന് ഇക്കാര്യങ്ങള് പ്രഖ്യാപിക്കാനാണ് സാദ്ധ്യത.