പ്രശസ്ത ഇന്ത്യന്‍ സംഗീതജ്ഞയായ ബോംബെ ജയശ്രീ ആശുപത്രിയില്‍. മസ്തിഷ്‌കാഘാതത്തെ തുടര്‍ന്നാണ് ആശുപത്രിയില്‍ പ്രവേശിപ്പിച്ചത്. ഇംഗ്ലണ്ടിലെ ലിവര്‍പൂളില്‍ ഒരു പൊതുചടങ്ങില്‍ പങ്കെടുക്കാന്‍ എത്തിയതായിരുന്നു ഗായിക.
പെട്ടെന്നുണ്ടായ ശാരീരിക ബുദ്ധിമുട്ടുകളെ തുടര്‍ന്ന് ആശുപത്രിയിലേക്ക് കൊണ്ടുപോകുകയായിരുന്നു. ബോംബെ ജയശ്രീയെ കീ ഹോള്‍ ശസ്ത്രക്രിയയ്ക്ക് വിധേയയാക്കിയിരിക്കുകയാണ്.
മരുന്നുകളോട് പ്രതികരിക്കുന്നുണ്ട്. സ്ഥിതി മെച്ചപ്പെടുമെന്ന് പ്രതീക്ഷിക്കുന്നതായി ഗായികയോടടുത്ത വൃത്തങ്ങള്‍ പറഞ്ഞുവെന്ന് ദ ഹിന്ദു റിപ്പോര്‍ട്ട് ചെയ്യുന്നു.
ജയശ്രീ രാംനാഥ് എന്ന ബോംബെ ജയശ്രീ കന്നഡ, തമിഴ്, തെലുങ്ക്, മലയാളം, ഹിന്ദി ഭാഷകളില്‍ നിരവധി സിനിമകളിലാണു പാടിയിട്ടുള്ളത്. 2021ലെ പദ്മശ്രീ അവാര്‍ഡ് ജേതാവുകൂടിയായ ജയശ്രീയെ കഴിഞ്ഞ ഞായറാഴ്ചയാണ് ഈ വര്‍ഷത്തെ സംഗീത കലാനിധി അവാര്‍ഡിനായി മദ്രാസ് മ്യൂസിക് അക്കാദമി ശുപാര്‍ശ ചെയ്തത്.
