തീയേറ്ററുകളില്‍ ജൈത്രയാത്ര തുടരുന്ന മമ്മൂട്ടി- ഖാലിദ് റഹ്മാന്‍ ചിത്രം ഉണ്ടയ്ക്ക് പ്രശംസയുമായി സംവിധായകന്‍ അരുണ്‍ഗോപി. ചിത്രം നല്‍കുന്നത് വ്യത്യസ്തമായ കാഴ്ച്ചാനുഭവമാണെന്നും സിനിമയിലെ മമ്മൂട്ടിയുടെ പ്രകടനം വാക്കുകള്‍ക്ക് അതീതമാണെന്നും അരുണ്‍ ഗോപി ഫെയ്‌സ്ബുക്കില്‍ കുറിച്ചു.
ഉണ്ട വളരെ വ്യത്യസ്തമായ കാഴ്ച്ചാനുഭവമാണ് സമ്മാനിക്കുന്നത്. ചിത്രത്തിലെ മമ്മൂക്കയുടെ പ്രകടനം വാക്കുകള്‍ക്കതീതമാണ്. സാധാരണം എന്നാല്‍ അസാധാരണവും. ഇത്തരത്തിലൊരു ചിത്രത്തിന് പിന്നില്‍ പ്രവര്‍ത്തിച്ച അണിയറപ്രവര്‍ത്തകരെയും സംവിധായകന്‍ ഖാലിദ് റഹ്മാനെയും അഭിനന്ദിക്കുന്നു. ഉണ്ടയ്ക്ക് എല്ലാവിധ പിന്തുണയും നല്‍കി ഒപ്പം നിന്ന നിര്‍മ്മാതാവ് കൃഷ്‌ണേട്ടനും അഭിനന്ദനം
സംവിധായകന്‍ ഖാലിദ് റഹ്മാന്‍, രചയിതാവ് ഹര്‍ഷാദ്, സാങ്കേതിക പ്രവര്‍ത്തകര്‍, മറ്റു അഭിനേതാക്കള്‍ എന്നിവരും അരുണ്‍ ഗോപി പ്രശംസ ചൊരിയുന്നുണ്ട്. മൂവി മില്‍സിന്റെ ബാനറില്‍ കൃഷ്ണന്‍ സേതുകുമാര്‍, ജമിനി സ്റ്റുഡിയോ എന്നിവര്‍ ചേര്‍ന്ന് നിര്‍മ്മിച്ച ഈ ചിത്രത്തില്‍ മമ്മൂട്ടിയോടൊപ്പം ഷൈന്‍ ടോം ചാക്കോ, അര്‍ജുന്‍ അശോകന്‍, ലുക്മാന്‍, ജേക്കബ് ഗ്രിഗറി, റോണി, രഞ്ജിത്ത്, ഭഗവന്‍ തിവാരി, ഓംകാര്‍ ദാസ് മണിപ്പൂരി, അഭിരാം തുടങ്ങിയവരും അഭിനയിച്ചിരിക്കുന്നു.
പ്രശാന്ത് പിള്ളയുടെ സംഗീതവും സജിത്ത് പുരുഷന്റെ ദൃശ്യങ്ങളും മികച്ചു നില്‍ക്കുന്നു. നിഷാദ് യൂസഫ് ആണ് ഈ ചിത്രത്തിന്റെ എഡിറ്റിംഗ് നിര്‍വഹിച്ചിരിക്കുന്നതു. ആസിഫ് അലി, വിനയ് ഫോര്‍ട്ട്, സുധി കോപ്പ, ദിലീഷ് പോത്തന്‍, കലാഭവന്‍ ഷാജോണ്‍ എന്നിവരും ഈ ചിത്രത്തില്‍ ചെറിയ വേഷങ്ങളില്‍ എത്തിയിട്ടുണ്ട്.