പുഷ്പ 2 വിന്റെ ഗംഭീര വിജയത്തിന് ശേഷം തന്റെ അടുത്ത ചിത്രത്തിനായി ഒരുങ്ങുകയാണ് തെലുങ്ക് താരം അല്ലു അർജുൻ. തെരി, മെർസൽ, ജവാൻ തുടങ്ങിയ സിനിമകളിലൂടെ സിനിമാപ്രേമികളെ ഞെട്ടിച്ച അറ്റ്ലി തന്നെയാണ് ചിത്രം സംവിധാനം ചെയ്യുന്നത്.
ഇപ്പോഴിതാ അല്ലു അർജുന്റെ പിറന്നാൾ ദിനത്തിൽ അറ്റ്ലീ സംവിധാനം ചെയ്യുന്ന ചിത്രത്തിന്റെ പ്രഖ്യാപനം നടത്തിയിരിക്കുകയാണ്. പ്രൊജക്റ്റിന്റെ നിർമാണം സൺ പിക്ചേഴ്സ് ആണ്. പ്രഖ്യാപനത്തിന്റെ ഭാഗമായി രണ്ടു മിനിറ്റുള്ള ഒരു വിഡിയോയും സൺ പിക്ചേഴ്സ് പുറത്തു വിട്ടിട്ടുണ്ട്.
ചിത്രത്തിൽ അഭിനയിക്കാൻ അല്ലു അർജുൻ 175 കോടി പ്രതിഫലം വാങ്ങുന്നതായി റിപോർട്ടുകൾ വന്നിരുന്നു. ഇത് കൂടാതെ സിനിമയുടെ ലാഭത്തിൽ നിന്നും 15 ശതമാനവും നിർമാതാക്കൾ താരത്തിന് നൽകുമെന്നും റിപ്പോർട്ടുകളുണ്ട്.
അതേസമയം, ഷാരൂഖ് ഖാൻ നായകനായ ജവാനാണ് അറ്റ്ലിയുടെതായി ഒടുവിൽ പുറത്തിറങ്ങിയ ചിത്രം. ദീപിക പദുകോൺ, വിജയ് സേതുപതി എന്നിവരും ചിത്രത്തിന്റെ ഭാഗമാണ്. ആഗോളതലത്തിൽ 1000 കോടിയിലധികം രൂപയാണ് ചിത്രം ബോക്സ് ഓഫീസിൽ നിന്നും നേടിയത്.