മലയാളത്തിലെ എവര്ഗ്രീന് ഹിറ്റ് ചിത്രം ‘ഗോഡ്ഫാദര്’ സിനിമ കോപ്പിയടിച്ച് അക്ഷയ് കുമാറിന്റെ ‘ഹൗസഫുള് 5’. ബോളിവുഡിലെ ഹിറ്റ് കോമഡി ഫ്രാഞ്ചൈസി ചിത്രങ്ങളില് ഒന്നാണ് ഹൗസ്ഫുള്. ചിത്രത്തിന്റെ അഞ്ചാം ഭാഗത്തിന്റെ ട്രെയ്ലര് ആണ് ചര്ച്ചകളില് ഇടം നേടിയിരിക്കുന്നത്. കഴിഞ്ഞ ദിവസമാണ് തരുണ് മന്സുഖാനി സംവിധാനം ചെയ്യുന്ന ചിത്രത്തിന്റെ ട്രെയ്ലര് എത്തിയത്.
ഗോഡ്ഫാദര് സിനിമയിലെ ക്ലൈമാക്സ് രംഗത്തില് ശങ്കരാടിയെ വച്ചുള്ള കോമഡി രംഗം അതുപോലെ ചിത്രത്തില് പകര്ത്തിയത് ട്രെയലറില് കാണാം. അഭിഷേക് ബച്ചന്, റിതേഷ് ദേശ്മുഖ്, ജാക്വലിന് ഫെര്ണാണ്ടസ്, നര്ഗീസ് ഫക്രി, ജാക്കി ഷ്രോഫ്, ചങ്കി പാണ്ഡെ തുടങ്ങി ആദ്യ ചിത്രങ്ങളില് ഉണ്ടായിരുന്ന മിക്ക താരങ്ങളും അഞ്ചാം ഭാഗത്തിലുമുണ്ട്.
കൂടാതെ സോനം ബജ്വ, സഞ്ജയ് ദത്ത്, നാനാ പടേക്കര്, ചിത്രാംഗദ സിങ്, ഫര്ദീന് ഖാന്, ജോണി ലിവര്, ശ്രേയസ് തല്പാഡെ, ഡിനോ മോറിയ, രഞ്ജിത്, സൗന്ദര്യ ശര്മ, നികിതിന് ധീര്, ആകാശ്ദീപ് സാബിര് എന്നീ താരങ്ങളും ചിത്രത്തിലുണ്ട്. സാജിദ് നദിയാദ്വാല നിര്മ്മിക്കുന്ന ചിത്രം ജൂണ് 6ന് ആണ് റിലീസ് ചെയ്യുന്നത്.
അതേസമയം, 2010ല് ആണ് ഹൗസ്ഫുള് എന്ന ആദ്യ ചിത്രം എത്തിയത്. 2012ല് ഹൗസ്ഫുള് 2 എത്തി. ഈ രണ്ട് സിനിമകളും സാജിദ് ഖാന് ആണ് സംവിധാനം ചെയ്തത്. 2016ല് എത്തിയ ഹൗസ്ഫുള് 3 സാജിദ് ഖാനും ഫര്ഹാദ് സാംജിയും ചേര്ന്നാണ് ഒരുക്കിയത്. 2019ല് റിലീസ് ചെയ്ത ഹൗസ്ഫുള് 4 ഫര്ഹാദ് സാംജിയുടെ സംവിധാനത്തിലാണ് എത്തിയത്.