വിടര്‍ന്ന കണ്ണുകളുള്ള സുന്ദരി എന്ന വിശേഷണത്തോടെ മലയാള സിനിമാ പ്രേമികളുടെ പ്രിയങ്കരിയായ നടിയാണ് അഹാന കൃഷ്ണ. താര കുടുംബത്തില്‍ നിന്നു വരുന്ന അഹാന വെള്ളിത്തിരയിലും മിനി സ്‌ക്രീനിലും ഒരുപോലെ തിളങ്ങി നില്‍ക്കുന്ന നടന്‍ കൃഷ്ണകുമാറിന്റെ മൂത്ത മകളാണ്. ഇപ്പോള്‍ യുവനടന്‍ ടൊവീനോയുടെ നായികയായി ലൂക്കയിലൂടെ എത്തി പ്രേക്ഷക മനംകവര്‍ന്ന അഹാന “പതിനെട്ടാം പടി”യിലൂടെയും പ്രേക്ഷ പ്രശംസ പിടിച്ചു പറ്റുകയാണ്. ചിത്രത്തിലെ ആനി എന്ന കഥാപാത്രം തന്നെ സ്‌നേഹിക്കാനും നഷ്ടങ്ങളെ കൈകാര്യം ചെയ്യാനും പഠിപ്പിച്ചു എന്ന് അഹാന ഇന്‍സ്റ്റഗ്രാമില്‍ കുറിച്ചു.
“എനിക്ക് സ്വപ്‌നതുല്യമായ ഒരു ഇന്‍ട്രോ ഷോട്ട് നല്‍കിയതിന് ശങ്കര്‍ രാമകൃഷ്ണന് നന്ദി. ആ രംഗമെടുത്തപ്പോഴും തിയേറ്ററില്‍ അത് കണ്ടപ്പോഴും എനിക്കത് വിശ്വസിക്കാനായില്ല. ഒരു ദിവസം മുഴുവന്‍ സാരിയില്‍ ചുറ്റിക്കറങ്ങാന്‍ ആനി എന്നെ പഠിപ്പിച്ചു. സ്‌നേഹിക്കാനും നഷ്ടങ്ങളെ കൈകാര്യം ചെയ്യാനും ആനി എന്നെ പഠിപ്പിച്ചു. ആനി എന്നാല്‍ പതിനെട്ടാം പടി എന്ന ഒരു വലിയ സിനിമയുടെ ചെറിയ ഭാഗമാണ്. എന്നിരുന്നാലും എന്റെ ഹൃദയം നിറയെ ഞാന്‍ അവളെ സ്‌നേഹിക്കുന്നു” അഹാന കുറിച്ചു.
https://www.instagram.com/p/BzibCKuALpO/?utm_source=ig_web_copy_link
നടനും എഴുത്തുകാരനുമായ ശങ്കര്‍ രാമകൃഷ്ണന് സംവിധാനം ചെയ്ത പതിനെട്ടാം പടി കഴിഞ്ഞ ദിവസമാണ് തിയേറ്ററുകളിലെത്തിയത്. ചിത്രത്തിന് പ്രേക്ഷകരില്‍ നിന്ന് മികച്ച പ്രതികരണമാണ് ലഭിക്കുന്നത്. ജോണ്‍ ഏബ്രഹാം പാലയ്ക്കലായുള്ള മമ്മൂട്ടിയുടെ പ്രകടനവും മറ്റ് താരങ്ങളുടെയും പുതുമുഖങ്ങളുടെയും അഭിനയവും ഗംഭീരമായിട്ടുണ്ടെന്നാണ് സോഷ്യല്‍ മീഡിയയിലൂടെ പ്രേക്ഷകര്‍ അഭിപ്രായപ്പെടുന്നത്. ശങ്കര്‍ രാമകൃഷ്ണനാണ് ചിത്രത്തിന് തിരക്കഥയും ഒരുക്കിയിരിക്കുന്നത്.