മലയാള സിനിമയില് പുതിയ റെക്കോര്ഡിട്ട് ‘ആടുജീവിതം’. മാര്ച്ച് 28ന് തിയേറ്ററുകളില് എത്തിയ ചിത്രം വെറും മൂന്ന് ദിനങ്ങള് കൊണ്ട് 50 കോടി ക്ലബ്ബില് എത്തിയിരിക്കുകയാണ്. ബോക്സ് ഓഫീസ് ട്രേഡ് അനലിസ്റ്റുകളാണ് ഈ വിവരം പങ്കുവച്ചിരിക്കുന്നത്. ആഗോളതലത്തില് ചിത്രം 50 കോടി നേടിയപ്പോള് ഏറ്റവും വേഗത്തില് ഈ നേട്ടം സ്വന്തമാക്കുന്ന മലയാള സിനിമയായി മാറിയിരിക്കുകയാണ് ആടുജീവിതം.
സ്വന്തം റെക്കോര്ഡ് കൂടിയാണ് പൃഥ്വി ഇപ്പോള് തകര്ത്തിരിക്കുന്നത്. പൃഥ്വിരാജിന്റെ ആദ്യ സംവിധാന സംരംഭമായ ‘ലൂസിഫര്’ ആയിരുന്നു ഏറ്റവും വേഗം 50 കോടി ക്ലബ്ബിലെത്തിയ ചിത്രങ്ങളുടെ കൂട്ടത്തില് ഒന്നാമത്. ഈ റെക്കേര്ഡ് ആണ് ആടുജീവിതം തിരുത്തിയത്. ഓപ്പണിംഗ് ദിനത്തില് 16.7 കോടിയായിരുന്നു ചിത്രത്തിന്റെ ആഗോള കളക്ഷന്.
ഗംഭീര പ്രതികരണങ്ങളാണ് ചിത്രത്തിന് ലഭിച്ചു കൊണ്ടിരിക്കുന്നത്. മണിരത്നം, കമല് ഹാസന്, മാധവന് തുടങ്ങി രാജ്യമെമ്പാടുമുള്ള പല പ്രമുഖരും ചിത്രത്തെ പ്രശംസിച്ച് രംഗത്തെത്തിയിരുന്നു. 16 വര്ഷത്തെ ബ്ലെസിയുടെ പ്രയത്നങ്ങളെയും പൃത്വിരാജിന്റെ ഡെഡിക്കേഷനെയും പുകഴ്ത്തിയാണ് പ്രേക്ഷകര് രംഗത്തെത്തുന്നത്.
അതേസമയം ആടുജീവിത്തതിന് ബഹ്റൈനില് പ്രദര്ശനാനുമതി ലഭിച്ചിരിക്കുകയാണ്. ഏപ്രില് മൂന്ന് മുതലാണ് സിനിമ ബഹ്റൈനില് പ്രദര്ശിപ്പിക്കുക. നേരത്തെ ജിസിസി രാജ്യങ്ങളില് യുഎഇയില് മാത്രമായിരുന്നു സിനിമയ്ക്ക് പ്രദര്ശനാനുമതി ലഭിച്ചിരുന്നത്.
ഒമാന്, ഖത്തര് എന്നിവിടങ്ങളിലെ സെന്സറിംഗ് മാര്ച്ച് 31ന് നടക്കുമെന്നും റിപ്പോര്ട്ടുകളുണ്ട്. മലയാള സിനിമയുടെ കളക്ഷനില് വലിയ പങ്ക് ജിസിസി രാജ്യങ്ങള് വഹിക്കുന്നുണ്ട്. അതുകൊണ്ട് ജിസിസി രാജ്യങ്ങളില് കൂടി പ്രദര്ശനം ആരംഭിച്ചാല് കളക്ഷനില് വന് കുതിപ്പ് ഉണ്ടാകുമെന്നാണ് വിലയിരുത്തപ്പെടുന്നത്.