“അടി കപ്യാരേ കൂട്ടമണി” എന്ന ഹിറ്റ് ചിത്രത്തിന് ശേഷം ജോണ് വര്ഗ്ഗീസ് സംവിധാനം ചെയ്യുന്ന പുതിയ ചിത്രമായ “ഉറിയടി”യുടെ ട്രെയിലര് പുറത്തിറങ്ങി. മലയാളത്തിലെ മുന്നിര ഹാസ്യതാരങ്ങള് അണിനിരക്കുന്ന ചിത്രം മികച്ച കോമഡി എന്റര്ടെയ്നര് തന്നെ ആയിരിക്കുമെന്നാണ് ട്രെയിലര് നല്കുന്ന ഉറപ്പ്.
പൊലീസ് ആസ്ഥാനത്തെ ഹൗസിംഗ് ക്വാട്ടേഴ്സില് സംഭവിക്കുന്ന ചില സംഭവങ്ങള് കൂട്ടിക്കലര്ത്തിയാണ് ചിത്രത്തിന്റെ കഥ പുരോഗമിക്കുന്നത്. സിദ്ദിക്ക്, ശ്രീനിവാസന്, സുധി കോപ്പ, മാനസ രാധാകൃഷ്ണന്, അജു വര്ഗ്ഗീസ്, ബിജുക്കുട്ടന്, പ്രേം കുമാര്, ശ്രീജിത്ത് രവി, ബൈജു, മുകേഷ്, ഇന്ദ്രന്സ്, ശ്രീലക്ഷ്മി വിജി, ആര്യ തുടങ്ങിയവരാണ് ചിത്രത്തിലെ പ്രധാന താരങ്ങള്.
ഫ്രണ്ട്സ് ഫിലിം ഫാക്ടറി, ഫിഫ്റ്റിസിക്സ് സിനിമാസ് എന്നിവയുടെ ബാനറില് നൈസാം എസ് സലീം, സുധീഷ് ശങ്കര്, രാജേഷ് നാരായണന് എന്നിവര് ചേര്ന്നാണ് ചിത്രം നിര്മ്മിക്കുന്നത്. ഛായാഗ്രഹണം ജെമിന് ജെ അയ്യനേത്ത്. അനില് പനച്ചൂരാന്, ബി കെ ഹരിനാരായണന് എന്നിവരുടെ വരികള്ക്കു ഇഷാന് ദേവ് സംഗീതം പകരുന്നു. ശബരിമലയിലെ സ്ത്രീ പ്രവേശനം സംബന്ധിച്ചുള്ള ചാനല് ചര്ച്ചയിലെ രാഹുല് ഈശ്വറിന്റെ പ്രകടനവും ആക്ഷേപ ഹാസ്യ രീതിയില് കാണിച്ചുകൊണ്ട് പുറത്തിറക്കിയിരുന്ന സിനിമയുടെ ടീസര് മുമ്പ് ഏറെ ചര്ച്ചയായിരുന്നു.