ഇപ്പോൾ സോഷ്യൽ മീഡിയ ഏറ്റെടുത്തിരിക്കുന്ന താരമാണ് സുരേഷ് കൃഷ്ണ. താരം ചെയ്ത വേഷങ്ങൾ ഏറെ സോഷ്യൽ മീഡിയയിൽ ചർച്ച ചെയ്യപ്പെടുന്നുമുണ്ട്. ‘കൺവിൻസിങ് സ്റ്റാർ’ എന്ന പേരാണ് നടന് ആരാധകർ ചാർത്തിക്കൊടുത്തിരിക്കുന്നത്. നിരവധി ട്രോളുകളാണ് താരത്തിന്റേതായി ഇപ്പോൾ സോഷ്യൽ മീഡിയയിയൽ നിറഞ്ഞുനിൽക്കുന്നത്.
ട്രോളുകളോട് അനുകൂല പ്രതികരണമാണ് താരത്തിന്റെ ഭാഗത്ത് നിന്നും ഉണ്ടാകാറുള്ളതും. ഇപ്പോഴിതാ വീണ്ടും ട്രെൻഡിങ് ആവുകയാണ് ‘കൺവിൻസിങ് സ്റ്റാർ’. ‘ഒരു ചതിയന്റെ വിജയം’ എന്ന ക്യാപ്ഷനോടെ ഇൻസ്റ്റാഗ്രാമിൽ 100k ഫോളോവേഴ്സ് തികഞ്ഞെന്ന പോസ്റ്റാണ് താരം പങ്കുവെച്ചത്. സിനിമയിലെ പറ്റിക്കലിന് ചാർത്തിക്കിട്ടിയ പേര് ആരാധകർക്ക് നേരെ പ്രയോഗിച്ചിരിക്കുകയാണ് നടൻ. ഈ ‘കൺവിൻസിങ്’ പോസ്റ്റും ആരാധകർ ഇതിനോടകം തന്നെ ഏറ്റെടുത്തിട്ടുമുണ്ട്.
പോസ്റ്റിന് പിന്നാലെ ആശംസകളുമായി നിരവധി ആരാധകരും എത്തി. എന്നാൽ വൈകാതെ താരത്തിന് 50k ഫോളോവേഴ്സ് ആണ് ഉള്ളതെന്ന് ആരാധകർ കണ്ടുപിടിച്ചു. ആരാധകരെ തന്നെ കൺവിൻസ് ചെയ്യിച്ച സുരേഷ് കൃഷ്‌ണയുടെ പോസ്റ്റിനും ഇപ്പോൾ ട്രോൾ പ്രവാഹമാണ്. രസകരമായ ഒരുപാട് കമെൻ്റുകളും പോസ്റ്റുകൾക്ക് ലഭിക്കുന്നുണ്ട്.
‘അണ്ണൻ കേക്ക് റെഡി ആക്ക്‌ ഞാൻ ആൾക്കാരെയും കൂട്ടി വരാം’, ‘100 K എന്നും പറഞ്ഞു ഇവിടെയും നമ്മളെ കൺവിൻസ് ആക്കി’, ‘100 k ആയി എന്ന് വിചാരിച്ചു നോക്കിയപ്പോൾ അണ്ണൻ വീണ്ടും convince ചെയ്ത് കളഞ്ഞു’ എന്നിങ്ങനെയുള്ള രസകരമായ അടിക്കുറിപ്പുകളാണ് താരത്തിന്റെ പോസ്റ്റിന് താഴെ വന്നിട്ടുള്ളത്. ഏതായാലും ഇതിനോടകം തന്നെ 50 k യിൽ നിന്നും 63.2k ഫോളോവേഴ്‌സിനെ താരം സ്വന്തമാക്കിയിട്ടുമുണ്ട്.
