തമിഴ് സിനിമയുമായി ബന്ധപ്പെട്ട നിര്മ്മാതാക്കളുടെയും വിതരണക്കാരുടെയും ഇടങ്ങളില് ശനിയാഴ്ച ഇന്കം ടാക്സ് വിഭാഗത്തിന്റെ റെയ്ഡ് . ചെന്നൈ, മധുര, കോയമ്പത്തൂര്, വെല്ലൂര് എന്നിവിടങ്ങളിലെ 40 സ്ഥാപനങ്ങളിലാണ് റെയ്ഡ് നടന്നത്. 2022 ഓഗസ്റ്റ് 2ന് ലഭിച്ച വിവരങ്ങളുടെ അടിസ്ഥാനത്തിലാണ് റെയ്ഡ് നടന്നത്. തമിഴ് സിനിമ രംഗത്തെ നിര്മ്മാതാക്കള്, വിതരണക്കാര്, ധനകാര്യ സ്ഥാപനങ്ങള് എന്നിവര്ക്കെതിരെ പരിശോധന നടന്നത് എന്നാണ് വിവരം.
കണക്കില്പ്പെടാത്ത പണമിടപാടുകളും നിക്ഷേപങ്ങളുമായി ബന്ധപ്പെട്ട നിരവധി ഡിജിറ്റല് തെളിവുകളും രേഖകളും പിടിച്ചെടുത്തതായി സെന്ട്രല് ബോര്ഡ് ഓഫ് ഡയറക്ട് ടാക്സസ് (സിബിഡിടി) അറിയിച്ചു.
26 കോടി രൂപയുടെ പണവും 3 കോടിയോളം രൂപയുടെ സ്വര്ണാഭരണങ്ങളും ഉള്പ്പെടെ 200 കോടിയിലധികം വരുന്ന വെളിപ്പെടുത്താത്ത വരുമാനമാണ് പരിശോധനയില് പിടിച്ചെടുത്തത് എന്നാണ് വിവരം.
കണക്കില് കാണിച്ചിരുന്ന തുകയേക്കാള് വളരെ കൂടുതലാണ് സിനിമകളില് നിന്ന് ലഭിക്കുന്ന യഥാര്ത്ഥ തുകയെന്നാണ് ഇന്കംടാക്സ് അധികൃതര് പറയുന്നത്.സിനിമ നിര്മ്മാണത്തിനായി പണം വായ്പ നല്കുന്ന സ്ഥാപനങ്ങളില് നടത്തിയ പരിശോധനയില് കണക്കില്പ്പെടാത്ത പണവായ്പയുമായി ബന്ധപ്പെട്ട പ്രോമിസറി നോട്ടുകള് ഉള്പ്പെടെയുള്ള രേഖകള് പിടിച്ചെടുത്തിട്ടുണ്ട്.
സിനിമാ വിതരണക്കാര് തിയേറ്ററുകളില് നിന്ന് കണക്കില്പ്പെടാത്ത പണം പിരിച്ചതിന് തെളിവുകള് ലഭിച്ചുവെന്നാണ് ഇന്കംടാക്സ് അധികൃതരെ ഉദ്ധരിച്ച് ദേശീയ മാധ്യമങ്ങള് റിപ്പോര്ട്ട് ചെയ്യുന്നത്.