കഴിഞ്ഞ ദിവസമാണ് ഫഹദ് ഫാസിലും വടിവേലുവും വീണ്ടുമൊന്നിക്കുന്ന ചിത്രത്തിന്റെ അപ്ഡേറ്റ് വന്നത്. മലയാളിയായ സംവിധായകൻ സുധീഷ് ശങ്കറിന്റെ മൂന്നാമത്തെ ചിത്രം കൂടിയാണിത്. അപ്പോഴും പ്രേക്ഷകർ ചോദിച്ചുകൊണ്ടിരിക്കുന്നത് മറ്റൊരു ചിത്രത്തെ കുറിച്ചായിരുന്നു.
‘ഹനുമാൻ ഗിയർ’ എന്ന പേരിൽ ഫഹദിനെ നായകനാക്കി സുധീഷ് ശങ്കർ സംവിധാനം ചെയ്യാനിരുന്ന ചിത്രത്തിന്റെ ടൈറ്റിൽ പോസ്റ്ററും അന്ന് പുറത്തുവിട്ടിരുന്നു. എന്നാൽ പിന്നീട് ചിത്രത്തെ കുറിച്ചുള്ള അപ്ഡേറ്റുകൾ ഒന്നും തന്നെ ഉണ്ടായിരുന്നില്ല. ചിത്രം ഉപേക്ഷിച്ചു എന്ന തരത്തിൽ റിപ്പോർട്ടുകളും ഉണ്ടായിരുന്നു.
എന്നാൽ ഇപ്പോഴിതാ ചിത്രത്തെ കുറിച്ചുള്ള ഏറ്റവും പുതിയ അപ്ഡേറ്റ് പുറത്തുവിട്ടിരിക്കുകയാണ് സംവിധായകൻ സുധീഷ് ശങ്കർ. ചിത്രം ഉപേക്ഷിച്ചിട്ടില്ലെന്നാണ് സംവിധായകൻ തന്നെ പറയുന്നത്. പുതുതായി പ്രഖ്യാപിച്ച ചിത്രത്തിന് ശേഷം ഹനുമാൻ ഗിയറിന്റെ ചിത്രീകരണം തുടങ്ങുമെന്നാണ് ഇപ്പോൾ സുധീഷ് അറിയിച്ചിരിക്കുന്നത്.
“ഞങ്ങള് ഹനുമാന് ഗിയര് ഉപേക്ഷിച്ചിട്ടില്ല. ഒന്ന് തള്ളിവച്ചു എന്നേ ഉള്ളൂ. ആദ്യം തമിഴ് സിനിമ ചെയ്യാമെന്നു കരുതി. ‘ഹനുമാന് ഗിയറി’ന് വലിയ തോതിലുള്ള വിഎഫ്എക്സ് വര്ക്ക് ആവശ്യമാണ്.
മൂന്ന് മാസം ഷൂട്ട് ചെയ്ത് ആറ് മാസത്തോളം സിജിഐയില് വര്ക്ക് ചെയ്യാനാണ് പ്ലാന്. എന്നാല് തമിഴ് ചിത്രം ഞങ്ങള്ക്ക് വേഗത്തില് പൂര്ത്തിയാക്കാന് കഴിയുന്ന ഒരു പ്രോജക്ടാണ്, അതിനാലാണ് ഞങ്ങള് ഇതുമായി മുന്നോട്ട് പോകാന് തീരുമാനിച്ചത്.” എന്നാണ് മാധ്യമം സിന്റിക്കേറ്റിന് നൽകിയ അഭിമുഖത്തിൽ സംവിധായകൻ സുധീഷ് ശങ്കർ പറഞ്ഞത്.