മതവുമായും ആത്മീയതയുമായും അകന്നെന്ന കാരണം പറഞ്ഞ് ദംഗല് ഫെയിം സൈറ വസീം അഭിനയം അവസാനിപ്പിച്ചത് സിനിമാലോകത്തും പുറത്തും വലിയ ചര്ച്ചാവിഷയമായിരിക്കുകയാണ്. സിനിമാരംഗത്തെ പല പ്രമുഖരും നടിയുടെ നിലപാടിനെ വിമര്ശിച്ച് രംഗത്തെത്തി. നടിയും നിര്മ്മാതാവുമായ രവീണ ടണ്ടന് വിഷയത്തില് വിയോജിപ്പു പ്രകടിപ്പിച്ച് ട്വീറ്റ് ചെയ്തിരുന്നു. സൈറയുടെ തീരുമാനം ഒരു ദുരന്തമാണെന്നാണ് അനുപം ഖെര് അഭിപ്രായപ്പെട്ടത്. എന്നാല് അവര്ക്ക് എന്തു വേണമെങ്കിലും തിരഞ്ഞെടുക്കാനുള്ള സ്വാതന്ത്ര്യമുണ്ടെന്നും അദ്ദേഹം കൂട്ടിച്ചേര്ത്തു.
ഇപ്പോഴിതാ, സംഭവത്തില് പ്രതികരണവുമായി രംഗത്ത് വന്നിരിക്കുകയാണ് നടന് സിദ്ധാര്ത്ഥ്. കലയില് മതത്തിന്റെ ആവശ്യകതയില്ലെന്നും മതം ഒരാളെ കലയില് നിന്ന് പിന്തിരിപ്പിക്കുന്നുവെങ്കില് അന്തിമമായി ആ വ്യക്തി കലയ്ക്ക് ചേര്ന്ന ആളല്ലെന്നും സിദ്ധാര്ത്ഥ് ട്വീറ്റ് ചെയ്തു. എന്നാല് സൈറയുടെ വ്യക്തിപരമായ തീരുമാനത്തെ ബഹുമാനിക്കുന്നുവെന്നും അദ്ദേഹം വ്യക്തമാക്കി.
ഇത് നിങ്ങളുടെ ജീവിതമാണ്. ഇഷ്ടമുള്ളതൊക്കെ ചെയ്തോളൂ. ഭാവിജീവിതത്തിന് ആശംസകള്. നമ്മുടെ കലയും കലാസപര്യയുമാണ് നമ്മുടെ ജീവിതമെന്നു ഞാന് വിശ്വസിക്കുന്നു. അതില്നിന്ന് മതത്തെ ഒഴിവാക്കാന് നാം പോരാടേണ്ടതുണ്ട്. അത് ഇവിടെ ആവശ്യമില്ല. നിങ്ങളുടെ മതമാണ് നിങ്ങളെ കൊണ്ട് ഇതു ചെയ്യിച്ചതെങ്കില്, അന്തിമമായി നിങ്ങള് ഇവിടേക്കു ചേര്ന്നയാളല്ല. ആശംസകള് സിദ്ധാര്ത്ഥ് ട്വിറ്ററില് കുറിച്ചു.
2016- ല് തിയേറ്ററുകളിലെത്തിയ ആമീര് ഖാന് ചിത്രം ദംഗലിലൂടെയാണ് കശ്മീര് സ്വദേശിനിയായ സൈറ ബോളിവുഡിലേക്ക് പ്രവേശിക്കുന്നത്. ദംഗലിലെ അഭിനയം സൈറയ്ക്ക് മികച്ച സഹനടിക്കുള്ള ദേശീയ അവാര്ഡ് നേടിക്കൊടുത്തിരുന്നു. 2017- ല് റിലീസ് ചെയ്ത സീക്രട്ട് സൂപ്പര് സ്റ്റാറില് ഇന്സിയ മാലിക്ക് എന്ന വേഷമാണ് സൈറ ചെയ്തത്. “ദ സ്കൈ ഈസ് പിങ്ക്” എന്ന ചിത്രമാണ് സൈറയുടെതായി ഇനി പുറത്തിറങ്ങാനിരിക്കുന്ന ചിത്രം.