നടന്‍ ഷെയ്ന്‍ നിഗത്തെ താന്‍ ആദ്യം തന്നെ നോട്ട് ചെയ്യിരുന്നതായി ഷൈന്‍ ടോം ചാക്കോ. അന്നയും റസൂലും ചിത്രത്തിലെ ഷൂട്ടിംഗ് അനുഭവങ്ങള്‍ പങ്കുവച്ചു കൊണ്ടാണ് ഷൈനിന്റെ പ്രതികരണം. ചിത്രത്തില്‍ അന്നയുടെ സഹോദരന്‍ കഥാപാത്രമായാണ് ഷെയ്ന്‍ നിഗം വേഷമിട്ടത്.
താന്‍, സണ്ണി വെയ്ന്‍, സൗബിന്‍ ഷാഹിര്‍, ഫഹദ് ഫാസില്‍ എന്നിവരുമായുള്ള ഫൈറ്റ് സീനിലൊക്കെ വളരെ ഗംഭീര പ്രകടനമാണ് ഷെയ്ന്‍ കാഴ്ചവച്ചത്. ഇത്ര ചെറിയൊരു പയ്യന്‍ ഇത്രയും നന്നായി അഭിനയിക്കുന്നല്ലോ എന്നൊക്കെ പറഞ്ഞു. മറൈന്‍ ഡ്രൈവില്‍ നടന്ന ഫൈറ്റ് സീനിനെ കുറിച്ചും ഷൈന്‍ ബിഹൈന്‍ഡ്വുഡിനോട് പറഞ്ഞു.
അന്ന് മറൈന്‍ ഡ്രൈവില്‍ ഓടിച്ചിട്ട് അടിക്കുന്ന രംഗങ്ങളൊക്കെ കണ്ട നാട്ടുകാര്‍ ശരിക്കും വിചാരിച്ചു തങ്ങള്‍ തല്ലുകൂടുകയാണെന്ന്. കാരണം അന്ന് ഷെയ്നിനെ ആര്‍ക്കും പരിചയമില്ല. തന്നെ അറിയില്ല, സൗബിനെ അറിയില്ല. ഫഹദിനെ ആണെങ്കിലും ആള്‍ക്കാര്‍ തിരിച്ചറിഞ്ഞ് തുടങ്ങുന്ന കാലമായിരുന്നു.
പിന്നെ ചുറ്റും ക്യാമറയൊന്നും ആരും കാണുന്നുമില്ല. എല്ലാം ഹൈഡ് ചെയ്തുള്ള ഷൂട്ടായിരുന്നു. ആളുകള്‍ നോക്കുമ്പോള്‍ രണ്ട് മൂന്ന് പേര് ഓടി വരുന്നു. അവരുടെ പിന്നാലെ ഒരുകൂട്ടം വരുന്നു. അവിടുന്ന് അവര്‍ കമ്പെടുത്ത് അടിക്കുന്നു. ഇഷ്ടികയെടുത്ത് അടിക്കുന്നു.
പെട്ടെന്ന് ആള്‍ക്കാരെല്ലാം ഓടിക്കൂടാന്‍ തുടങ്ങി. അപ്പോഴേക്കും തങ്ങള്‍ കാറില്‍ കയറി പോകുകയായിരുന്നു. കമ്മട്ടിപ്പാടം, പറവ, ഇഷ്‌ക് തുടങ്ങിയ ചിത്രത്തങ്ങളിലും ഷെയ്‌നിനൊപ്പം ഷൈന്‍ അഭിനയിച്ചു. സാമ്യമുള്ള പേര് ആയതിനാല്‍ ഷെയ്‌നിന് പകരം പലരും തന്നെ വിളിക്കാറുണ്ടെന്നും ഷൈന്‍ പറഞ്ഞു.