മോഹൻലാൽ- ജീത്തു ജോസഫ് കൂട്ടുക്കെട്ടിൽ പുറത്തിറങ്ങിയ ‘നേര്’ മികച്ച പ്രേക്ഷക പ്രതികരണങ്ങളുമായി മുന്നേറുകയാണ്. പ്രദർശിപ്പിച്ച എല്ലാ കേന്ദ്രങ്ങളിൽ നിന്നും മികച്ച സ്വീകരണമാണ് ചിത്രത്തിന് ലഭിച്ചുകൊണ്ടിരിക്കുന്നത്.
ജീത്തു ജോസഫും ശാന്തി മായാദേവിയും ചേർന്നാണ് ചിത്രത്തിന് തിരക്കഥയെഴുതിയിരിക്കുന്നത്. നേരത്തെ ദൃശ്യം- 2ൽ അഭിഭാഷകയായി വന്ന് ശാന്തി മായദേവി പ്രേക്ഷകശ്രദ്ധ നേടിയിരുന്നു.
ഇപ്പോഴിതാ നേരിന്റെ തിരക്കഥ രൂപപ്പെട്ടുവന്നതിനെ കുറിച്ച് സംസാരിക്കുകയാണ് ശാന്തി മായദേവി. ദൃശ്യം 2 വിന്റെ സമയത്താണ് ജീത്തു ജോസഫ് തനിക്കൊരു കോർട്ട് റൂം ഡ്രാമ ചെയ്യണമെന്ന ആഗ്രഹം പ്രകടിപ്പിച്ചത് എന്നാണ് ശാന്തി മായദേവി പറയുന്നത്.
“ദൃശ്യത്തിന്റെ സമയത്ത് ജീത്തു സാറാണ് ഇങ്ങോട്ട് ഒരു ത്രെഡ് പറഞ്ഞത്. എനിക്കൊരു കോർട്ട് റൂം ഡ്രാമ ചെയ്യണം എൻ്റെ കുറേ കാലത്തെ ആഗ്രഹമാണത് എന്നായിരുന്നു അദ്ദേഹം പറഞ്ഞത്.
മലയാളത്തിൽ ഒരു കോർട്ട് റൂം ഡ്രാമ ചെയ്യാം എന്ന് ജീത്തു സാർ പറഞ്ഞു. അത് കേട്ടപ്പോൾ തന്നെ ഞാൻ ചോദിച്ചത് വളരെ ആധികാരികമായിട്ടാണോ എന്നായിരുന്നു. ജീത്തു സാർ അതെയെന്ന് പറഞ്ഞപ്പോൾ അത് വളരെ ബോറായിരിക്കും അല്ലെങ്കിൽ ഡ്രൈ ആയിരിക്കുമെന്ന് ഞാൻ പറഞ്ഞു.
ഒരു എന്റർടൈൻമെൻ്റ് പാക്കേജിൽ അതിനെ ഉണ്ടാക്കിയെടുക്കുക എന്ന് പറഞ്ഞാൽ അത് കുറച്ച് പ്രയാസമാണ്. ഒരു കോർട്ട് റൂം ഡ്രാമയിൽ പങ്കുചേരാൻ എനിക്ക് സന്തോഷമേയുള്ളൂ. കാരണം അതെൻ്റെ ഏരിയയാണ്.
പക്ഷെ ഞാൻ വലിയ എഴുത്തുകാരിയൊന്നുമല്ല. എനിക്ക് എഴുതി പരിചയവുമില്ല. അത് കുഴപ്പമില്ല നമുക്ക് റിയലിസ്റ്റിക്കായിട്ട് ചെയ്യാം ഞാൻ ഉണ്ടല്ലോ കൂടെയെന്ന് അദ്ദേഹം പറഞ്ഞു. കോടതി ഭാഗങ്ങളൊക്കെ ഞാൻ എഴുതി ഇമോഷൻസ് സാധനങ്ങളൊക്കെ ജീത്തു സാറും എഴുതി. പിന്നെ അത് രണ്ടും മിക്സ് ചെയ്തു. ഭയങ്കര നല്ല പ്രോസസ്സ് ആയിരുന്നു. ഇപ്പോൾ പറയുമ്പോൾ നല്ല സന്തോഷം തോന്നുന്നു.”