നടി മീര ജാസ്മിന്‍ നീണ്ട ഒരു ഇടവേളയ്ക്ക് ശേഷം സംവിധായകന്‍ സത്യന്‍ അന്തിക്കാടിന്റെ സിനിമയായ മകളിലൂടെ വീണ്ടും മലയാളസിനിമയില്‍ തിരിച്ചെത്തിയിരിക്കുകയാണ്. ഈ അവസരത്തില്‍ നടിയെക്കുറിച്ച് സത്യന്‍ അന്തിക്കാട് പറഞ്ഞ കാര്യങ്ങളാണ് ഇപ്പോള്‍ ശ്രദ്ധേയമാകുന്നത്. ഇന്ത്യാഗ്ലിറ്റ്സ് മലയാളത്തിന് നല്‍കിയ അഭിമുഖത്തിലാണ് സത്യന്‍ അന്തിക്കാട് മീര ജാസ്മിനെ കുറിച്ച് സംസാരിക്കുന്നത്.
‘മീര ജാസ്മിന്‍ വളരെ പ്രത്യേകതകളുള്ളൊരു കുട്ടിയാണ്. മീര ജാസ്മിനെ കുറിച്ച് ധാരാളം ആളുകള്‍ പലരീതിയില്‍ സംസാരിക്കാറുണ്ട്. അഹങ്കാരിയാണ്, അനുസരണയില്ലാത്തവളാണ് എന്നൊക്കെ, എന്നെ സംബന്ധിച്ച് എനിക്ക് ഏറ്റവും കൂടുതല്‍ കോപറേറ്റ് ചെയ്യുന്ന താരമാണ് മീര ജാസ്മിന്‍. ഇതില്‍ ഒരു കാര്യം എന്താണെന്ന് വെച്ചാല്‍ നമ്മള്‍ അങ്ങോട്ട് എങ്ങനെ പെരുമാറുന്നോ അതുപോലെ തന്നെയായിരിക്കും അവര്‍ ഇങ്ങോട്ടും.
സിനിമയില്‍ വരുമ്പോള്‍ മീര എന്റെ കുടുംബത്തിലെ ഒരുകുട്ടിയാണ്. ഞാന്‍ അതുപോലെയാണ് അവരെ സ്നേഹിക്കുന്നത്, അതുപോലെ തന്നെ അവര്‍ തിരിച്ചും തരുന്നു. അവരുടെ പേഴ്സണല്‍ പ്രശ്നങ്ങളിലേക്ക് ഞാന്‍ കയറാറില്ല. ഒരു സെറ്റിലേക്ക് വരുമ്പോള്‍ അവരെയാണ് നമ്മള്‍ സ്നേഹിക്കുന്നത്, അല്ലാതെ അവരുടെ കുടുംബ കാര്യങ്ങള്‍ അല്ലെങ്കില്‍ പ്രയാസങ്ങള്‍ ഇതിനെ പറ്റിയൊന്നും നമ്മള്‍ ചിന്തിക്കരുത്. അദ്ദേഹം കൂട്ടിച്ചേര്‍ത്തു.