തനിക്കെതിരെ എത്തുന്ന വിമര്ശനങ്ങള്ക്ക് കൃത്യമായി മറുപടി നല്കാറുള്ള താരമാണ് സാനിയ അയ്യപ്പന്. കഴിഞ്ഞ ദിവസം സാനിയയുടെ ഒരു വീഡിയോ വൈറലായിരുന്നു. സാനിയയ്ക്കൊപ്പം ഒരു ആരാധകന് എടുക്കുന്ന സെല്ഫി ഫ്രെയ്മിലേക്ക് അദ്ദേഹത്തിന്റെ സുഹൃത്തോ സഹപ്രവര്ത്തകനോ ആയ ആള് കൂടി കയറിനില്ക്കുന്നതാണ് വീഡിയോ.
രണ്ടാമത്തെ ആള് തനിക്കടുത്തേക്ക് നില്ക്കുമ്പോള് അകന്നുനില്ക്കുന്ന സാനിയയാണ് വീഡിയോയില്. ഈ വീഡിയോ വൈറല് ആയതോടെ പലരും സാനിയയെ വിമര്ശിച്ച് രംഗത്തെത്തിയിരുന്നു. ഇപ്പോഴിതാ അതില് വിശദീകരണവുമായി എത്തിയിരിക്കുകയാണ് സാനിയ ഇപ്പോള്.
‘സാറ്റര്ഡേ നൈറ്റ്’ സിനിമയുടെ പ്രമോഷനിടെ ഒരാള് സാനിയയോടും നടി ഗ്രേസ് ആന്റണിയോടും മോശമായി പെരുമാറിയിരുന്നു. ഈ സംഭവം താന് മറന്നിട്ടില്ല എന്നു പറഞ്ഞു കൊണ്ടാണ് സാനിയ വിശദീകരണവുമായി എത്തിയിരിക്കുന്നത്. ഇന്സ്റ്റഗ്രാം സ്റ്റോറിയായി പങ്കുവച്ച പോസ്റ്റ് ഇപ്പോള് ശ്രദ്ധ നേടുകയാണ്.
”ഈയിടെ ഒരു വ്യക്തിയോട് ഞാന് വിദ്വേഷം കാണിക്കുന്ന രീതിയിലുള്ള ഒരു സാമൂഹ്യ വീഡിയോ മാധ്യമങ്ങളില് വൈറലാവുകയും അതില് ചില വ്യക്തികള് അവരുടെ വിയോജിപ്പ് കമന്റുകളിലൂടെ പ്രകടിപ്പിക്കുകയും ചെയ്തു. മറ്റാരെയും പോലെ സ്വകാര്യ ജീവിതത്തില് പല രീതിയിലുള്ള പ്രശ്നങ്ങള് നേരിടുന്ന ഒരു വ്യക്തിയാണ് ഞാനും.”
”കുറച്ച് മാസങ്ങള്ക്ക് മുമ്പ് എന്റെ ജീവിതത്തില് ഒട്ടും മറക്കാന് പറ്റാത്ത അനുഭവം ഉണ്ടായി. ആ സംഭവത്തിന് ശേഷം പലരും എന്നെ പിന്തുണയ്ക്കാതിരിക്കുകയും എതിര്പ്പ് പ്രകടിപ്പിക്കുകയും ചെയ്തിരുന്നു. എല്ലാം ഞാന് ഉള്ളിലൊതുക്കിയെങ്കിലും ഓരോ തവണയും മനസിനുള്ളിലെ ആ ഭയം എന്നോടൊപ്പം തന്നെ ഉണ്ടായിരുന്നു.”
”ഇതെല്ലാം അനുഭവിച്ചത് ഞാനായിരുന്നു എന്നതിനാല് ഇതിന്റെ ഗൗരവം എല്ലാവര്ക്കും ഒരുപോലെയല്ലെന്ന സത്യവും ഞാന് മനസിലാക്കുന്നു. ഒരിക്കലും ആരെയും വേദനിപ്പിക്കുക എന്നതല്ല എന്റെ ഉദ്ദേശമെന്ന് സമൂഹത്തോട് വ്യക്തമാക്കാന് ഞാന് ആഗ്രഹിക്കുന്നു. അബദ്ധവശാല് ഞാന് അങ്ങനെ ചെയ്തെങ്കില് ആത്മാര്ഥമായി ക്ഷമ ചോദിക്കുന്നു” എന്നാണ് സാനിയ കുറിച്ചിരിക്കുന്നത്.
