പേരില് ‘മേനോന്’ എന്ന ജാതി നാമം ഒഴിവാക്കുന്നതായി നടി സംയുക്ത. ധനുഷ് നായകനായ, റിലീസിന് തയാറെടുക്കുന്ന ‘വാത്തി’ സിനിമയുടെ പ്രമോഷന്റെ ഭാഗമായി നടത്തിയ അഭിമുഖത്തിലാണ് തന്നെ ഇനി ‘മേനോന്’ ചേര്ത്തു വിളിക്കരുതെന്ന് സംയുക്ത ആവശ്യപ്പെട്ടത്.
സോഷ്യല് മീഡിയ ഹാന്ഡിലുകളില്നിന്നു കുറച്ചു നാള് മുന്പു തന്നെ മേനോന് ഒഴിവാക്കിയിരുന്നുവെന്നും താരം പറയുന്നു. ഫെബ്രുവരി 17ന് തിയറ്ററുകളിലെത്തുന്ന ‘വാത്തി’യില് സ്കൂള് ടീച്ചറുടെ വേഷത്തിലാണ് സംയുക്ത എത്തുന്നത്.
ഈ സിനിമയുമായി ബന്ധപ്പെട്ട ഒരു അഭിമുഖത്തില് മാധ്യമ പ്രവര്ത്തക സംയുക്ത മേനോന് എന്നു വിളിച്ചപ്പോള്, തന്നെ സംയുക്ത എന്നു മാത്രം വിളിച്ചാല് മതിയെന്ന് നടി പറയുകയായിരുന്നു. ”എന്നെ സംയുക്ത എന്നു വിളിച്ചാല് മതി. മേനോന് എന്ന ജാതി വാല് മുന്പ് ഉണ്ടായിരുന്നു.
പക്ഷേ ഞാന് അഭിനയിക്കുന്ന സിനിമകളില് എന്റെ പേരില്നിന്ന് ‘മേനോന്’ നീക്കം ചെയ്യാന് നിര്മാതാക്കളോട് ആവശ്യപ്പെട്ടിട്ടുണ്ട്. സോഷ്യല് മീഡിയ ഹാന്ഡിലുകളില്നിന്ന് കുറച്ചു നാള് മുന്പ് തന്നെ ഞാന് ജാതി വാല് ഒഴിവാക്കിയിരുന്നു”- സംയുക്ത പറയുന്നു. ‘കടുവ’യിലാണ് സംയുക്ത അവസാനം പ്രത്യക്ഷപ്പെട്ടത്.
സായി ധരം തേജ് ചിത്രം വിരുപാക്ഷയാണ് നടിയുടെ പുതിയ പ്രോജക്ട്.