ഇന്ന് പലരും തന്നെയൊരു പരാജയമായാണ് കാണുന്നതെന്ന് നടി സാമന്ത. സക്‌സസ് എന്ന് പറഞ്ഞാല്‍ എന്താണെന്ന് പറയുന്നതിനിടെയാണ് രണ്ട് വര്‍ഷമായി താന്‍ സിനിമകള്‍ ചെയ്യാത്തതിനെ കുറിച്ച് സാമന്ത പറഞ്ഞത്. വിജയത്തെ കുറിച്ചുള്ള തന്റെ കാഴ്ചപ്പാടില്‍ മാറ്റം വന്നിട്ടുണ്ട് എന്നാണ് താരം പറയുന്നത്. തന്റെ കാഴ്ചപ്പാടില്‍ താന്‍ വിജയിച്ചാണ് നില്‍ക്കുന്നതെന്നും സാമന്ത വ്യക്തമാക്കി.
ഇന്ന് വിജയം എന്നാല്‍ സ്വാതന്ത്ര്യമാണ്. രണ്ട് വര്‍ഷത്തെ ഇടവേള എടുക്കാന്‍ സാധിക്കുന്ന സ്വാതന്ത്ര്യം. രണ്ട് വര്‍ഷമായി എന്റെ ഒരു സിനിമയും റിലീസ് ചെയ്തിട്ടില്ല. വളരാനും, ഒരു ബോക്സിനുള്ളില്‍ ഒതുങ്ങിയിരിക്കാതിരിക്കാനുമുള്ള സ്വാതന്ത്ര്യം. ഇന്ന് പലരും എന്നെ ഒരു വിജയമായിട്ടല്ല കാണുന്നത്. പ്രത്യേകിച്ചും നേരത്തേതുമായി താരതമ്യം ചെയ്യുമ്പോള്‍.
എന്റെ കാഴ്ചപ്പാടില്‍ ഞാന്‍ എന്നത്തേതിനാക്കാളും വിജയിച്ചു നില്‍ക്കുകയാണ്. ഇപ്പോള്‍ ഓരോ ദിവസവും ഞാന്‍ എഴുന്നേല്‍ക്കുന്നത് സന്തോഷത്തോടെയും ആവേശത്തോടെയുമാണ്. കാരണം എനിക്ക് സന്തോഷം നല്‍കുന്ന കാര്യങ്ങളാണ് ഞാന്‍ ചെയ്യുന്നത്. ഇന്ന് തന്നെ സംബന്ധിച്ച് വിജയം എന്നാല്‍ അത് പുറമെ നിന്ന് ലഭിക്കുന്ന അംഗീകാരമല്ല.
മറിച്ച് എന്റെ മൂല്യങ്ങള്‍ ജീവിതത്തിലും ജോലിയിലും പ്രതിഫലിപ്പിക്കാന്‍ സാധിക്കുന്നതാണ് എന്നാണ് സാമന്ത പറയുന്നത്. അതേസമയം, 2023ല്‍ പുറത്തിറങ്ങിയ ഖുഷി ആണ് സാമന്തയുടെതായി ഒടുവില്‍ പുറത്തിറങ്ങിയ സിനിമ. ഈ വര്‍ഷം നടിയുടെ നിര്‍മ്മാണത്തില്‍ ശുഭം എന്ന സിനിമ റിലീസ് ചെയ്തിരുന്നു. എന്നാല്‍ ഈ ചിത്രം വലിയ ഹിറ്റ് ആയില്ല.
ഫാമിലി മാന്‍ 2, സിറ്റാഡില്‍ എന്നീ വെബ് സീരിസുകള്‍ ഒഴിച്ചാല്‍ സാമന്തയ്ക്ക് അടുത്തിടെ ബോക്‌സ് ഓഫീസില്‍ വലിയ നേട്ടം കൊയ്യാന്‍ സാധിച്ചിട്ടില്ല. നടിയുടെതായി ഒടുവില്‍ തിയേറ്ററുകളിലെത്തിയ യശോദ, ശാകുന്തളം, ഖുഷി എന്നീ സിനിമകള്‍ പരാജയമായി മാറിയിരുന്നു.