ചോക്ലേറ്റ്, റോബിന്ഹുഡ്, മേക്കപ്പ്മാന്, സീനിയേഴ്സ് തുടങ്ങി സച്ചി-സേതു കൂട്ടുകെട്ടില് ധാരാളം വന്ഹിറ്റുകളാണ് പിറവിയെടുത്തത്. എന്നാല് അധികം വൈകാതെ തന്നെ ഇരുവരും പിരിയുകയും ചെയ്തു. ഇപ്പോഴിതാ സേതുവുമായുള്ള വേര്പിരിയലിന് വഴിതെളിച്ചത് എന്തായിരുന്നുവെന്ന് വെളിപ്പെടുത്തിയിരിക്കുകയാണ് സച്ചി.
താനും സേതുവും സിനിമയിലേയ്ക്ക് ഒരുമിച്ചു കടന്നുവന്നത് പിരിയാനുള്ള തീരുമാനവുമായിട്ടായിരുന്നുവെന്നാണ് സംവിധായകനും തിരക്കഥാകൃത്തുമായ സച്ചി നേരെ ചൊവ്വയില് പറഞ്ഞത്.
“വക്കീലായി ഹൈക്കോടതിയില് പ്രാക്ടീസ് തുടങ്ങി, ഏകദേശം നാല് കൊല്ലം കഴിയുമ്പോഴാണ് ഞാനും സേതുവും പരിചയപ്പെടുന്നത്. രണ്ട് പേര്ക്കും സിനിമയെക്കുറിച്ച് താല്പര്യവും അറിവുമുണ്ട്. വൈകുന്നേരം സമയങ്ങളില് ഇതിനെക്കുറിച്ച് ചര്ച്ച െചയ്യുകയും ചെയ്തിരുന്നു. അതിന് ശേഷമാണ് കൂട്ടായശ്രമം നടത്തിക്കളയാമെന്ന ചിന്തയിലേയ്ക്ക് വരുന്നത്. അത്രയും നാളത്തെ പരിചയപ്പെടലില് തന്നെ ഞങ്ങള്ക്ക് മനസ്സിലായി, രണ്ട് പേര്ക്കും രണ്ട് അഭിരുചികളാണെന്ന്. ഞങ്ങള് യോജിക്കുന്നതു തന്നെ പിരിയാന് തീരുമാനിച്ചിട്ടാണ്.”
“ഒരു എന്ട്രിക്കു വേണ്ടി ഒന്നോ രണ്ടോ സിനിമകള് ചെയ്യാം. അതിനു ശേഷം ഒന്നു ചവിട്ടി നിന്നതിനു ശേഷം നമുക്ക് നമ്മുടേതായ സ്വതന്ത്ര സിനിമകള് ചെയ്യാം. തുടക്കത്തിലെ സമയത്ത് ഒരു എക്സര്സൈസ് എന്ന നിലയില് കൂട്ടായ്മ നല്ലതാണ്. എന്നാല് അതിനു ശേഷം ഒറ്റയ്ക്കൊറ്റയ്ക്ക് ചെയ്യുന്നത് തന്നെയാണ് ശരി.”സച്ചി വ്യക്തമാക്കി.