തെന്നിന്ത്യന്‍ സിനിമ ഇന്‍ഡസ്ട്രിയെ വളരെ ബഹുമാനത്തോടെയാണ് നോക്കുന്നതെന്ന് നടി പ്രിയങ്ക ചോപ്ര. തനിക്ക് തമിഴിലും തെലുങ്കിലും മലയാളത്തിലും ഒരുപാട് സുഹൃത്തുക്കളുണ്ടെന്നും ഈ ഭാഷകളില്‍ ഏതെങ്കിലും നല്ലൊരു പ്രൊജക്ട് വന്നാല്‍ അഭിനയിക്കാന്‍ തയാറാണെന്നും നടി പറഞ്ഞു. കൂടാതെ സിനിമ രംഗത്ത് നേരിട്ട ബുദ്ധിമുട്ടുകളെക്കുറിച്ചും പ്രിയങ്ക വെളിപ്പെടുത്തി. മലയാള മനോരമയ്ക്ക് നല്‍കിയ അഭിമുഖത്തിലാണ് നടി ഇക്കാര്യങ്ങള്‍ പറഞ്ഞത്.
തെന്നിന്ത്യന്‍ സിനിമകളെ ഏറെ ബഹുമാനത്തോടെയാണ് നോക്കികാണുന്നത്. എനിക്ക് തമിഴിലും തെലുങ്കിലും മലയാളത്തിലും സുഹൃത്തുക്കളുണ്ട്. ആകര്‍ഷകമായ പ്രോജെക്ട് വന്നാല്‍ ഏറ്റെടുക്കാന്‍ തയാറാണ്. ഭാഷയുടെ കാര്യത്തില്‍ അല്പം സഹായം വേണ്ടിവരും’. പ്രിയങ്ക പറഞ്ഞു.
‘ബോളിവുഡ് വിടാനുണ്ടായ സാഹചര്യത്തെക്കുറിച്ചും ഒരു പോഡ്കാസ്റ്റില്‍ സംസാരിച്ചിരുന്നു. ജീവിതത്തില്‍ പ്രതിസന്ധികളുണ്ടാകും. താഴെ വീണു കിടക്കുന്നവരെ ചവിട്ടാനാണ് ആളുണ്ടാകുക. സ്വയം സ്‌നേഹിക്കുകയും ബഹുമാനിക്കുകയും ചെയുമ്പോഴാണത് സാധ്യമാകുക. ഈ പാഠം വളരെ ചെറുപ്പത്തില്‍ തന്നെ മാതാപിതാക്കള്‍ എനിക്ക് പകര്‍ന്നു തന്നതാണ്’. നടി കൂട്ടിച്ചേര്‍ത്തു.
അതേസമയം, പ്രിയങ്ക ചോപ്ര പ്രധാന വേഷത്തില്‍ എത്തുന്ന ‘സിറ്റഡല്‍’ എന്ന ആമസോണ്‍ വെബ് സീരീസ് ഈ മാസം 28ന് റിലീസ് ചെയ്യും. ഇപ്പോള്‍ നടിയും സംഘവും സീരീസിന്റെ പ്രൊമോഷന്‍ ജോലികളുടെ തിരക്കിലാണ്. റൂസോ ബ്രദേഴ്‌സ് നിര്‍മാതാക്കളാകുന്ന വെബ് സീരീസില്‍ റിച്ചാല്‍ഡ് മാഡന്‍ ആണ് നായക വേഷത്തില്‍.