നിവിന്‍ പോളി ചിത്രം കായംകുളം കൊച്ചുണ്ണിയില്‍ അഭിനയിക്കാനായി പ്രിയാ ആനന്ദ് വേണ്ടെന്ന് വെച്ചത് നേരത്തെ സൈന്‍ ചെയ്ത മൂന്നു ചിത്രങ്ങള്‍. ഒരു പീരിഡ് ചിത്രത്തില്‍ അഭിനയിക്കാനുള്ള താല്‍പര്യം കൊണ്ടാണ് മറ്റ് ചിത്രങ്ങള്‍ വേണ്ടെന്ന് വെച്ചതെന്നാണ് പ്രിയാ ആനന്ദ് പറയുന്നത്. തന്നെയുമല്ല മലയാളത്തിലെ ഏറ്റവും പ്രമുഖരില്‍ ഒരാള്‍ക്കൊപ്പം അഭിനയിക്കുന്നു എന്നതും തന്നെ ആകര്‍ഷിച്ചുവെന്നും പ്രിയ കൂട്ടിച്ചേര്‍ത്തു.
പൃഥ്വിരാജിന്റെ ഹൊറര്‍ ചിത്രം എസ്രയില്‍ നായികയായിട്ടാണ് പ്രിയാ ആനന്ദ് മലയാളത്തില്‍ അരങ്ങേറ്റം കുറിച്ചത്. തമിഴ്, കന്നഡ, ഹിന്ദി ചിത്രങ്ങളില്‍ അഭിനയിച്ചിട്ടുള്ള പ്രിയ ഇന്ത്യ മുഴുവന്‍ ആരാധകരുള്ള നടിയാണ്.
നാല് മുതല്‍ അഞ്ച് മാസത്തോളം ഷൂട്ട് ചെയ്താല്‍ മാത്രമെ കായംകുളം കൊച്ചുണ്ണിയുടെ ഷെഡ്യൂള്‍ പൂര്‍ത്തിയാകുകയുള്ളു. ഇതിനിടയില്‍ മറ്റ് ചിത്രങ്ങളില്‍ അഭിനയിക്കുക സാധ്യമല്ല. പീരിഡ് ചിത്രമായതിനാല്‍ ലുക്കിലും മറ്റും വലിയ മാറ്റങ്ങള്‍ ആവശ്യവുമാണ്.
റോഷന്‍ ആന്‍ഡ്രൂസ് സംവിധാനം ചെയ്യുന്ന ചിത്രത്തിലെ നിവിന്‍പോളിയുടെ ലുക്ക് ഇപ്പോള്‍ തന്നെ വലിയ ചര്‍ച്ചയായിട്ടുണ്ട്. ഈ സെറ്റില്‍ സൂര്യയും ജ്യോതികയും സന്ദര്‍ശനത്തിന് എത്തിയതും വാര്‍ത്തയായിരുന്നു.