ഒരു സിനിമയ്ക്ക് ലഭിക്കാവുന്നതില്‍ വച്ച് ഏറ്റവും വലിയ ഹൈപ്പിലാണ് പൃഥ്വിരാജ് ചിത്രം ‘എമ്പുരാന്‍’ ഉള്ളത്. സൂപ്പര്‍ ഹിറ്റ് ചിത്രം ‘ലൂസിഫറി’ന്റെ രണ്ടാം ഭാഗമായി എമ്പുരാന്‍ പ്രഖ്യാപിച്ചിട്ട് വര്‍ഷങ്ങളായിട്ടും ചിത്രത്തെ കുറിച്ചുള്ള റിപ്പോര്‍ട്ടുകള്‍ മാത്രമാണ് പ്രചരിച്ചു കൊണ്ടിരിക്കുന്നത്. മമ്മൂട്ടിയും ദുല്‍ഖറും എമ്പുരാനില്‍ ഉണ്ടാകുമെന്ന റിപ്പോര്‍ട്ടുകള്‍ കുറച്ചധികം നാളുകളായി പ്രചരിക്കുന്നുണ്ട്.
ദുല്‍ഖറും എമ്പുരാനില്‍ ഉണ്ടാകുമോ എന്ന ചോദ്യത്തോട് പ്രതികരിച്ചിരിക്കുകയാണ് പൃഥ്വിരാജ് ഇപ്പോള്‍. ”ആരൊക്കെ എമ്പുരാനില്‍ ഉണ്ടാകുമെന്ന് ഞാന്‍ പുറത്തുവിട്ടിട്ടില്ല. മോഹന്‍ലാല്‍ ഉണ്ടാകും എന്നേ നിലവില്‍ പറയാനാകൂ” എന്നാണ് പൃഥ്വിരാജ് പറയുന്നത്.
എന്നാല്‍ ദുല്‍ഖറിനൊപ്പം താനൊരു സിനിമ ചെയ്യുമെന്നും പൃഥ്വിരാജ് പറയുന്നുണ്ട്. ”ദുല്‍ഖറിനൊപ്പം എനിക്ക് ഒരു മലയാള സിനിമയില്‍ വേഷമിടണമെന്നുണ്ട്. ദുല്‍ഖറിനും അങ്ങനെ ഒരു ആഗ്രഹമുണ്ടാകും. ഞങ്ങളെ രണ്ടു പേരെയും ഒന്നിച്ച് സിനിമയില്‍ കാണാന്‍ ജനങ്ങളും ആഗ്രഹിക്കുന്നുണ്ടാകും.”
”അതിനാല്‍ മികച്ച ഒരു തിരക്കഥയ്ക്ക് മാത്രമേ ഞങ്ങള്‍ രണ്ടുപേരും സമ്മതം നല്‍കൂ. ഞങ്ങള്‍ക്ക് യോജിക്കുന്ന ഒരു സിനിമ കഥ ഉണ്ടാകുമെന്ന് പ്രതീക്ഷിക്കുന്നു” എന്നും പൃഥ്വിരാജ് പറഞ്ഞു. അതേസമയം, എമ്പുരാന്റെ ഷൂട്ടിംഗ് പൃഥ്വിരാജ് ആരംഭിച്ചിരുന്നു. ചിത്രത്തിന്റെ ആദ്യ ഷെഡ്യൂള്‍ പൂര്‍ത്തിയായ വിവരവും പൃഥ്വി അറിയിച്ചിരുന്നു.
ലഡാക്കില്‍ ആയിരുന്നു ആദ്യ ഷെഡ്യൂളിന്റെ പൂര്‍ത്തീകരണം. സംവിധാനത്തിന് പുറമെ സയിദ് മസൂദ് എന്ന കഥാപാത്രത്തെ പൃഥ്വിരാജ് അവതരിപ്പിക്കുന്നുമുണ്ട്. സ്റ്റീഫന്‍ നെടുമ്പുള്ളി എങ്ങനെ അബ്രാം ഖുറേഷി ആയി എന്ന കഥയായിരിക്കും എമ്പുരാനില്‍ പറയുക എന്നാണ് വിവരം.