അവതാരകയും അഭിനേത്രിയുമായ പാര്‍വതി കൃഷ്ണയുടേയും സംഗീത സംവിധായകനായ ബാലഗോപാലിനും കുഞ്ഞ് പിറന്നത് അടുത്തിടെയാണ്. ഗര്‍ഭിണിയായതിന് ശേഷമുള്ള വിശേഷങ്ങളെല്ലാം പ്രേക്ഷകര്‍ക്കായി പങ്കിട്ടിരുന്നു പാര്‍വതി കൃഷ്ണ. യൂട്യൂബ് ചാനലിലൂടെയായി പങ്കിടുന്ന വിശേഷങ്ങളെല്ലാം പെട്ടെന്ന് തന്നെ വൈറലായി മാറാറുണ്ട്. പ്രസവ ശേഷമുള്ള തടി കുറച്ചതിനെക്കുറിച്ചും പാര്‍വതി തുറന്ന് പറഞ്ഞിരുന്നു. വനിതയ്ക്ക് നല്‍കിയ അഭിമുഖത്തിനിടയിലായിരുന്നു പാര്‍വതി മനസുതുറന്നത്.
ഗര്‍ഭിണിയായ സമയത്ത് ശരീരഭാരം കൂടിയിരുന്നു. തടി കൂടിയതിനെക്കുറിച്ച് നെഗറ്റീവ് കമന്റുകളും കേള്‍ക്കേണ്ടി വന്നിരുന്നു താരത്തിന്. അമ്മി ലുക്കിലായല്ലോ, ആന്റിയുടെ പേരെന്താണ് എന്നൊക്കെയായിരുന്നു ചിലരുടെ ചോദ്യങ്ങള്‍.എന്നാല്‍ താന്‍ നന്നായി പരിശ്രമിച്ച് തടി കുറച്ചുവെന്നും നടി അഭിമുഖത്തില്‍ പറഞ്ഞിരുന്നു.
മുമ്പ് ബോഡി ഷെയ്മിങ്ങ് നേരിടേണ്ടി വന്നിട്ടുണ്ടെങ്കിലും അന്ന് വിമര്‍ശിച്ചവരെല്ലാം ഇന്ന് അഭിനന്ദിക്കുന്ന അവസ്ഥയാണ്. ശരീരഭാരം കൂടിയത് തന്നെ മാനസികമായി ബാധിച്ചിരുന്നില്ല. അന്നും ഇന്നും ആത്മവിശ്വാസത്തിന് തെല്ലുംകുറവില്ല. അന്നത്തെ കമന്റുകളൊക്കെ ബാധിച്ചിരുന്നുവെങ്കില്‍ ഡിപ്രഷനൊക്കെ വന്നേനെ, അത് കുഞ്ഞിനേയും ബാധിച്ചേനെയെന്നും പാര്‍വതി പറയുന്നു.
