നടി തമന്നയെ പരാമര്ശിച്ചു കൊണ്ടുള്ള തമിഴ് താരവും സംവിധായകനുമായ പാര്ത്ഥിപന്റെ വാക്കുകള് വിവാദത്തില്. കമല് ഹാസന്-ശങ്കര് കോമ്പോയില് എത്തിയ ‘ഇന്ത്യന് 2’ എന്ന ബിഗ് ബജറ്റ് സിനിമയ്ക്കൊപ്പമാണ് പാര്ത്ഥിപന് സംവിധാനം ചെയ്ത് അഭിനയിച്ച ‘ടീന്സ്’ എന്ന ചിത്രം റിലീസ് ചെയ്തത്. ഇന്ത്യന് 2 തിയേറ്ററില് തളര്ന്നപ്പോള് ടീന്സ് ശ്രദ്ധ നേടിയിരുന്നു.
എന്നാല് സിനിമ അധികം തിയേറ്ററുകളില് എത്തിയിരുന്നില്ല. ഇതിനിടെ ചിത്രത്തിന്റെ വിജയാഘോഷം നടക്കുന്നതിനിടെ പാര്ത്ഥിപന് പറഞ്ഞ കാര്യങ്ങളാണ് വിവാദമായത്. ഇപ്പോഴത്തെ തമിഴ് സിനിമയുടെ അവസ്ഥ പറഞ്ഞ പാര്ത്ഥിപന്, തന്റെ ചിത്രത്തില് കഥയൊന്നും ഇല്ലെങ്കിലും തമന്നയുടെ ഒരു ഡാന്സ് ഉണ്ടായിരുന്നെങ്കില് പടം ഇതിലും നന്നായി ഓടും എന്നാണ് നടന് പറഞ്ഞത്.
എന്നാല് ഈ പരാമര്ശം വളരെ വിവാദമായി അടുത്തിടെ തമന്ന അഭിനയിച്ച ‘ജയിലര്’, ‘അരണ്മനൈ 4’ എന്നിവയില് തമന്നയുടെ ഐറ്റം ഡാന്സ് ഉണ്ടായിരുന്നു പടം വന് വിജയവും ആയിരുന്നു. ഇതാണ് പാര്ത്ഥിപന് ഉദ്ദേശിച്ചത് എന്ന് വിമര്ശനം ഉയര്ന്നു. എന്നാല് സംഭവം വിവാദമായപ്പോള് വിശദീകരണവുമായി പാര്ത്ഥിപന് തന്നെ രംഗത്തെത്തി.
തന്റെ അഭിപ്രായം തമന്നയെയോ മറ്റേതെങ്കിലും നടിയെയോ കുറച്ചുകാട്ടാനല്ലെന്നും, മറിച്ച് സമകാലിക സിനിമയില് കഥയുടെയും ആഖ്യാനത്തിന്റെ പ്രധാന്യം കുറയുന്നതിനെ കുറിച്ചുള്ള തന്റെ ആശങ്ക പങ്കുവച്ചതാണ് എന്നാണ് പാര്ത്ഥിപന് പറയുന്നത്.
തമന്നയെയോ അവരുടെ ആരാധകരെയോ തന്റെ വാക്കുകള് എന്തെങ്കിലും തരത്തില് വേദനിപ്പിച്ചെങ്കില് താന് മാപ്പ് പറയുന്നുവെന്നും പാര്ത്ഥിപന് വ്യക്തമാക്കി. ഇന്നത്തെ തമിഴ് സിനിമാ രംഗത്ത് നല്ല കഥ ആഖ്യാനത്തിന്റെ പ്രാധാന്യം കുറഞ്ഞു വരുന്നതിനെ കുറിച്ച് ശ്രദ്ധയില്പ്പെടുത്തുക മാത്രമാണ് തന്റെ ഉദ്ദേശ്യമെന്ന് അദ്ദേഹം ആവര്ത്തിച്ചു.