സിനിമാതാരങ്ങളുടെ ചെയ്തികള്‍ ആരാധകര്‍ പകര്‍ത്തുമെന്നത് സ്വഭാവികമാണ്. “ഞാനാഗ്രഹിക്കുന്നത് എന്നില്‍ നിന്ന് നല്ല കാര്യങ്ങള്‍ അവര്‍ പകര്‍ത്തണമെന്നാണ്. പകര്‍ത്താവുന്ന എലമെന്റുകള്‍ അവര്‍ കണ്ടെത്തണം, അതിനെ അനുകരണം ,പകര്‍ത്തല്‍ എന്നൊന്നും പറയില്ല. ഉള്‍ക്കൊള്ളല്‍ എന്നാണ് ശരിയായ വാക്ക്”- മോഹന്‍ലാല്‍ പറഞ്ഞു.
ഒരു ഉദാഹരണം പറയാം ഒരു വയസായ സ്ത്രീ ഇങ്ങോട്ടു വരികയാണെന്നിരിക്കട്ടെ ഞാന്‍ അറിയാതെ തന്നെ എഴുന്നേല്‍ക്കും അതെന്റെ സഹജമായ സ്വഭാവമാണ്. ബോധപൂര്‍വ്വം ചെയ്യുന്നതേ അല്ല. അതു പോലെ ഞാന്‍ കണ്ട അമിതാഭ് ബച്ചന്‍ ഒരു സ്ത്രീ സംസാരിയ്ക്കാന്‍ വന്നാല്‍ അല്ലെങ്കില്‍ പ്രായത്തില്‍ മുതിര്‍ന്ന ഒരാള്‍ വന്നാല്‍ ഇരിപ്പിടത്തില്‍ നിന്നെഴുന്നേല്‍ക്കും. അത് പ്രായമായവരോട്, പിന്നെ സ്ത്രീത്വത്തോടൊക്കെയുള്ള ബഹുമാനമാണ്. എവിടെ നിന്നാണ് അതൊക്കെ കിട്ടിയതെന്ന് നമുക്ക് പറയാനാവുമോ ഇല്ല അതു പോലെ അനുകരിയ്ക്കാനാവുന്ന ഒരുപാട് കാര്യങ്ങളുണ്ട്. ആളുകളില്‍ മാത്രമെന്നു പറയുന്നില്ല. കലാസൃഷ്ടികളിലുമുണ്ട്. മോഹന്‍ലാല്‍ പറയുന്നു.
എന്നാല്‍ അനുകരിയ്ക്കരുതാത്ത കാര്യങ്ങളുമുണ്ടെന്ന് അദ്ദേഹം വിശദീകരിയ്ക്കുന്നു. അതു കണ്ടു പിടിക്കേണ്ടത് അവരവര്‍ തന്നെയാണ് അതല്ലേ വിവേചനബുദ്ധി. ഒരു നര്‍മ്മ രംഗത്തില്‍ ഒരാള്‍ വെള്ളമടിച്ച് കോണ്‍ തെറ്റി ഓടയില്‍ വീഴുന്നുണ്ടെങ്കിലും അതു ജീവിതത്തിലായാല്‍ നര്‍മ്മമല്ലാതാകും നമ്മളെ ആളുകള്‍ ഓര്‍ക്കുന്നത് പല കഥാപാത്രങ്ങളും സന്ദര്‍ഭങ്ങളുമായാണ്. എന്നാല്‍ കുട്ടികള്‍ക്കു പോലും എന്നോട് വലിയ താല്‍പര്യമാണ്. അതിന്റെ കാരണം എനിയ്ക്കറിയില്ല. എന്തോചില ഘടകങ്ങള്‍ അവരുടെ ബുദ്ധിയെ സ്‌ട്രൈക് ചെയ്യുന്നുണ്ട്. ഇതു തന്നെയാണ് മുതിര്‍ന്നവരിലും കാണുന്നത് മോഹന്‍ലാല്‍ വ്യക്തമാക്കി.