മലയാളി പ്രേക്ഷകരെ പൊട്ടിച്ചിരിപ്പിച്ച സിദ്ദിഖ്-ലാല് ചിത്രമാണ് ‘ഇന് ഹരിഹര് നഗര്’. ചിത്രത്തിലെ ഏകാന്ത ചന്ദ്രികേ, ഉന്നം മറന്ന ഗാനങ്ങള് എല്ലാം ഇന്നും മലയാളികള് മൂളികൊണ്ട് നടക്കുന്നവയാണ്. അശോകന്, മുകേഷ്, സിദ്ദിഖ്, ജഗദീഷ് എന്നിവര് വേഷമിട്ട ചിത്രത്തില് ഗീത വിജയന് ആണ് നായികയായി എത്തിയത്.
എന്നാല് ചിത്രത്തിലെ നായികയായി ആദ്യം തീരുമാനിച്ചിരുന്നത് നടി മാല പാര്വതിയെ ആയിരുന്നു. മാല പാര്വതി തന്നെയാണ് ഇക്കാര്യം വെളിപ്പെടുത്തിയിരിക്കുന്നത്. വീട്ടില് നിന്നും വിടാതിരുന്നതു കൊണ്ടാണ് അഭിനയിക്കാന് കഴിയാഞ്ഞത് എന്നാണ് മാല പാര്വതി പറയുന്നത്.
ഒരു അഭിമുഖത്തിനിടെ ‘ഏകാന്ത ചന്ദ്രികേ’ മാലാ പാര്വതിയെ നോക്കിയായിരുന്നു പാടേണ്ടിയിരുന്നതെന്ന് അവതാരക പറഞ്ഞപ്പോള് അത് തനിക്കറിയില്ല എന്നായിരുന്നു അശോകന് പറഞ്ഞത്. ഈ സമയത്താണ് മാല പാര്വതി ചിത്രത്തിനായി തന്നെ സമീപിച്ചിരുന്നുവെന്ന് പറഞ്ഞത്.
”ഇന് ഹരിഹര് നഗറിലെ ഗീതാ വിജയന്റെ ക്യാരക്ടറിന് എന്നെ വിളിച്ചിട്ടുണ്ടായിരുന്നു. ദൂരദര്ശന്റെ ബൈജുവേട്ടന് ദിലീപ് സാറും ഒക്കെ അച്ഛന്റെ സഹോദരിയുടെ അടുത്ത് എന്നെ അഭിനയിക്കാന് വിടുമോ എന്ന് ചോദിച്ചു. ഇന് ഹരിഹര് നഗറിലേക്ക് കാസ്റ്റ് ചെയ്യാന് വേണ്ടിയിട്ട് ആയിരുന്നു.”
”പക്ഷേ വീട്ടില് നിന്നും വിട്ടില്ല. അച്ഛനോട് ചോദിച്ചപ്പോള് അവള് പഠിക്കട്ടെ എന്ന് പറഞ്ഞു. അശോകന് ചേട്ടന് അത് അറിയില്ലായിരുന്നു. മെയ് മാസ പുലരിയില് അഭിനയിക്കാന് പോയതിന് അച്ഛന്റെ കയ്യില് നിന്നും അടി കിട്ടിയിരുന്നു” എന്നാണ് മാല പാര്വതി പറയുന്നത്.