കെ. ജി. എഫ് ചിത്രങ്ങളിലൂടെ ഇന്ത്യയൊട്ടാകെ ആരാധകരെ സൃഷ്ടിച്ച സംവിധായകനാണ് പ്രശാന്ത് നീൽ. രണ്ട് ഭാഗങ്ങളായി വന്ന കെജിഎഫ് സിനിമയ്ക്ക് മൂന്നാം ഭാഗമുണ്ടാവുമോ എന്നാണ് ഇപ്പോൾ പ്രേക്ഷകർ ഏറ്റവും കൂടുതൽ ചോദിച്ചുകൊണ്ടിരിക്കുന്ന ഒരു ചോദ്യം.
ഇപ്പോഴിതാ ചിത്രത്തിന് മൂന്നാം ഭാഗം ഉണ്ടാവുമെന്ന് സൂചന തന്നിരിക്കുകയാണ് സംവിധായകൻ പ്രശാന്ത് നീൽ. ചിത്രത്തിന്റെ തിരക്കഥ പൂർത്തിയായിട്ടുണ്ടെന്നും യാഷ് തന്നെയാവും ചിത്രത്തിൽ പ്രധാന വേഷത്തിലെത്തുന്നത് എന്നാണ് പ്രശാന്ത് നീൽ പറയുന്നത്.
“ചിത്രത്തിന് തീർച്ചയായും മൂന്നാം ഭാഗമുണ്ട്, തിരക്കഥ പൂർത്തിയായിട്ടുണ്ട്. യാഷ് തന്നെയാണ് നായകന്. എന്നാൽ സംവിധായകനായി ഞാൻ ഉണ്ടാവുമോ എന്ന കാര്യത്തിൽ ഉറപ്പില്ല. സലാറിന് ശേഷം ഞാൻ ചെയ്യുന്ന ചിത്രമായിരിക്കും എൻ.ടി.ആർ 31. 2024 പകുതിയോടെയാവും ചിത്രീകരണം ആരംഭിക്കുക.
അമിതാഭ് ബച്ചൻ ചിത്രങ്ങൾ കണ്ടാണ് ഞാൻ വളർന്നത്. എന്നെങ്കിലുമൊരിക്കൽ അദ്ദേഹത്തിന് ആക്ഷനും കട്ടും പറയണം. എന്റെ ചിത്രത്തിൽ അഭിനയിക്കാൻ അദ്ദേഹം സമ്മതംമൂളുമെന്നാണ് കരുതുന്നത്.” പിങ്ക് വില്ലയ്ക്ക് നൽകിയ അഭിമുഖത്തിലാണ് പ്രശാന്ത് നീൽ കെജിഎഫ് മൂന്നാം ഭാഗത്തെ കുറിച്ച് സംസാരിച്ചത്.
ഡിസംബർ 22 നാണ് പ്രഭാസ് നായകനായെത്തുന്ന ‘സലാർ’ റിലീസ് ആവുന്നത്. കെജിഎഫ്നു ശേഷമെത്തുന്ന പ്രശാന്ത് നീൽ ചിത്രമായതുകൊണ്ട് തന്നെ വലിയ പ്രതീക്ഷകളിലാണ് സലാറിനെ പ്രേക്ഷകർ നോക്കികാണുന്നത്.