അനൂപ് സത്യന് ഒരുക്കി സംവിധാനം ചെയ്യുന്ന “വരനെ ആവശ്യമുണ്ട്” ഈ വെള്ളിയാഴ്ച തിയേറ്ററുകളിലേക്ക് എത്തുകയാണ്. ചിത്രത്തിന്റെ കഥ ആദ്യം കേട്ടപ്പോള് തന്നെ തന്റെ കണ്ണുനിറഞ്ഞു പോയെന്ന് വെളിപ്പെടുത്തിയിരിക്കുകയാണ് കല്യാണി പ്രിയദര്ശന്. അത്രയും മനോഹരവും ഹൃദയസ്പര്ശിയുമായ കഥയാണ് അനൂപ് തന്നോട് പറഞ്ഞതെന്ന് താരം ഒരു അഭിമുഖത്തിനിടെ വ്യക്തമാക്കി.
കല്യാണി ആദ്യമായി മലയാളത്തില് നായികാ വേഷം ചെയ്യുന്ന ചിത്രം കൂടിയാണ് വരനെ ആവശ്യമുണ്ട്. ദുല്ഖര് സല്മാന്, ശോഭന, സുരേഷ് ഗോപി, കല്യാണി പ്രിയദര്ശന് എന്നിവരാണ് വരനെ ആവശ്യമുണ്ട് ചിത്രത്തില് കേന്ദ്ര കഥാപാത്രങ്ങളായെത്തുന്നത്. ഹ്യൂമറിന് പ്രാധാന്യം നല്കുന്ന ഒരു കുടുംബചിത്രമായാണ് സിനിമ എത്തുക. അനൂപ് സത്യന്റെ ആദ്യ സംവിധാന സംരംഭവും ദുല്ഖര് സല്മാന് നിര്മിക്കുന്ന മൂന്നാമത്തെ ചിത്രവുമാണിത്.
ദുല്ഖര് സല്മാന്റെ പ്രൊഡക്ഷന് കമ്പനിയായ വേഫെയ്റര് ഫിലിംസും എം സ്റ്റാര് ഫിലിംസും ചേര്ന്നാണ് ചിത്രം നിര്മ്മിക്കുന്നത്. ലാലു അലക്സ്, കെപിഎസി ലളിത, ഉര്വ്വശി, സംവിധായകരായ മേജര് രവി, ലാല് ജോസ്, ജോണി ആന്റണി എന്നിവരും സന്ദീപ് രാജ്, വഫാ ഖദീജ, ദിവ്യ മേനോന് അഹമ്മദ്, മീര കൃഷ്ണന് എന്നിവര്ക്കൊപ്പം സൗബിന് ഷാഹിറും അതിഥി വേഷത്തിലെത്തും.