“ദൃശ്യ”ത്തിന്റെ ചൈനീസ് റീമേക്ക് “ഷീപ് വിത്തൗട്ട് എ ഷെപ്പേര്‍ഡ്” സൂപ്പര്‍ഹിറ്റ് ചാര്‍ട്ടില്‍ ഇടംപിടിച്ചതില്‍ അഭിമാനമുണ്ടെന്ന് അറിയിച്ച് സംവിധായകന്‍ ജീത്തു ജോസഫ്. ചിത്രത്തിന്റെ കഥയും കഥാപാത്രങ്ങളും അത്രമേല്‍ ആഴത്തിലിറങ്ങുന്നതാണെന്നു വീണ്ടും തെളിയിക്കപ്പെട്ടതില്‍ അഭിമാനമുണ്ടെന്ന് ജീത്തു ജോസഫ് വ്യക്തമാക്കി.
“”ചൈനയിലും ഈ കഥയെയും കഥാപാത്രങ്ങളെയും പ്രേക്ഷകര്‍ ഏറ്റെടുത്തുവെന്നറിയുന്നതില്‍ വലിയ സന്തോഷമുണ്ട്. ചിത്രത്തിന്റെ കഥയും കഥാപാത്രങ്ങളും പ്രേക്ഷകരിലേക്ക് അത്രമേല്‍ ആഴത്തിലിറങ്ങുന്നതാണെന്നു വീണ്ടും തെളിയിക്കപ്പെട്ടതില്‍ അഭിമാനവുമുണ്ട്”” എന്ന് ജീത്തു ജോസഫ് പറഞ്ഞു.
ഷീപ് വിത്തൗട്ട് എ ഷെപ്പേര്‍ഡ് റിലീസ് ചെയ്ത് മൂന്നാഴ്ച പിന്നിടുമ്പോള്‍ കലക്ഷന്‍ ചാര്‍ട്ടില്‍ 1000 കോടി കടന്നതായാണ് ചൈനീസ് മാധ്യമങ്ങള്‍ റിപ്പോര്‍ട്ട് ചെയ്യുന്നത്. രാജ്യാന്തര ഭാഷയിലേക്ക് റീമേക്ക് ചെയ്യപ്പെട്ട ആദ്യ മലയാള സിനിമ കൂടിയായി മാറുകയാണ് ദൃശ്യം. തമിഴ്, ഹിന്ദി, തെലുങ്ക്, കന്നഡ എന്നീ ഭാഷകളിലാണ് ഇതിനു മുന്‍പ് റീമേക്ക് നടന്നത്. മലയാളത്തില്‍ ആദ്യമായി 50 കോടി കളക്ഷന്‍ നേടിയ സിനിമ കൂടിയായിരുന്നു ഇത്.