ജ്യോതിക നായികയായി എത്തിയ ഏറ്റവും പുതിയ ചിത്രമാണ് ജാക്ക്പോട്ട്. രേവതിയും ചിത്രത്തില് ഒരു പ്രധാനവേഷം കൈകാര്യം ചെയ്യുന്നുണ്ട്.
ജ്യോതിക പൊലീസ് ഉദ്യോഗസ്ഥയായി എത്തുന്ന ചിത്രം ആക്ഷന്-കോമഡി എന്റര്ടെയ്നറായാണ് ഒരുക്കിയിരിക്കുന്നത്. ഇപ്പോഴിതാ തനിക്കൊരു ശ്കതമായ ഡോണ് കഥാപാത്രം ചെയ്യണമെന്ന ആഗ്രഹം തുറന്നു പറഞ്ഞിരിക്കുകയാണ് രേവതി.
“150 സിനിമകളെങ്കിലും കുറഞ്ഞത് ഞാന് ചെയ്തിട്ടുണ്ടാവും.സത്യത്തില്, ഒരു ശക്തമായ ഡോണ് കഥാപാത്രത്തെ ചെയ്യണമെന്ന് ആഗ്രഹമുണ്ട്. “പുതുമൈ പെണ്ണി”ല് അഭിനയിക്കുമ്പോള് എനിക്ക് 17 വയസ്സാണ് പ്രായം. അഭിനയത്തെക്കുറിച്ചോ സിനിമയുടെ ക്രാഫ്റ്റിനെ കുറിച്ചോ എനിക്ക് അധികമൊന്നും അറിയില്ലായിരുന്നു. ഇപ്പോള് അങ്ങനെയല്ല, കൂടുതല് പക്വത വന്നു. കഥാപാത്രത്തെ കൂടുതല് മനസ്സിലാക്കാന് സാധിക്കും. കൂടുതല് സംവിധായകരും എന്നെ സമീപിക്കുന്നത് അമ്മ വേഷങ്ങള് ചെയ്യാനാണ്. അതിലെനിക്ക് താല്പ്പര്യമില്ല. ഞാന് ആസ്വദിക്കാത്ത ഒന്ന് ഞാനെന്തിനാണ് ചെയ്യുന്നത്.”” ഇന്ത്യന് എക്സ്പ്രസുമായുള്ള അഭിമുഖത്തില് രേവതി പറഞ്ഞു.
എസ് കല്യാണ് ഒരുക്കിയ ചിത്രമാണ് ജാക്ക്പോട്ട്. വര്ഷങ്ങള്ക്ക് ശേഷം രേവതി ഹാസ്യ സ്വഭാവത്തിലുള്ള ഒരു മുഴുനീള വേഷം ചെയ്യുന്നു എന്ന സവിശേഷത കൂടിയുണ്ട് ചിത്രത്തിന്. മന്സൂര് അലിഖാന്, ആനന്ദരാജ്, രാജേന്ദ്രന് തുടങ്ങിയവരും ചിത്രത്തില് പ്രധാന വേഷത്തിലെത്തുന്നു. ജ്യോതികയുടെ ഭര്ത്താവും നടനുമായ സൂര്യയുടെ ഉടമസ്ഥതയിലുള്ള 2ഡി എന്റര്ടൈന്മെന്റ് ആണ് ചിത്രം നിര്മ്മിച്ചത്.