ദളപതി വിജയ്യെയും ലേഡി സൂപ്പര്‍സ്റ്റാര്‍ നയന്‍താരയെയും കേന്ദ്ര കഥാപാത്രങ്ങളാക്കി അറ്റ്‌ലി കുമാര്‍ സംവിധാനം ചെയ്യുന്ന ബിഗില്‍ റിലീസിന് തയ്യാറെടുക്കുകയാണ്. ദീപാവലി റിലീസായി എത്തുന്ന ചിത്രത്തിനായി ഏരെ ആകാംക്ഷയോടെയാണ് ആരാധകര്‍ കാത്തിരിക്കുന്നത്. ചിത്രത്തില്‍ മലയാളത്തില്‍ നിന്ന് ഫുട്ബോള് താരവും നടനുമായ ഐ.എം വിജയനും എത്തുന്നുണ്ട്. ബിഗില്‍ മാസ്സാണെന്നാണ് വിജയന്‍ പറയുന്നത്. ബ
“ബിഗില്‍ മാസ്സാണ്, വിജയ് സാര്‍ വേറെ ലെവലാണ്. വിജയ് സാറിനെ കണ്ടപ്പോള്‍ ഞാന്‍ ഫുട്ബോള് താരമാണെന്ന് പറഞ്ഞ് പരിചയപ്പെട്ടു. അപ്പോള്‍ എന്നെ അറിയാമെന്നും കേട്ടിട്ടുണ്ടെന്നും സിനിമയില്‍ അഭിനയിക്കുന്നതിന് ഏറെ നന്ദിയുണ്ടെന്നും വിജയ് സാര്‍ പറഞ്ഞു. മറഡോണയെ നേരില്‍ കണ്ട അനുഭവമായിരുന്നു എനിക്ക് വിജയ് സാറിനെ കണ്ടപ്പോഴും. മറഡോണയെ കെട്ടിപ്പിടിച്ചപ്പോള്‍ ഉണ്ടായ അതേ ഫീല്‍ വിജയ് സാറിന് കൈ കൊടുത്തപ്പോഴും ഉണ്ടായി”. ഒരു അഭിമുഖത്തില്‍ വിജയന്‍ പറഞ്ഞു.
തെരി, മെര്‍സല്‍ എന്നീ സൂപ്പര്‍ഹിറ്റുകള്‍ക്കു ശേഷം വിജയും അറ്റലിയും ഒന്നിക്കുന്ന ചിത്രമാണ് ബിഗില്‍. ഫുട്ബോള് പരിശീലകന്റെ വേഷത്തിലാണ് വിജയ് ചിത്രത്തില്‍ എത്തുന്നത്. വിജയിയുടെ 63 മത് ചിത്രമാണിത്. ചിത്രത്തില്‍ വിവേക്, പരിയേറും പെരുമാള്‍ ഫെയിം കതിര്‍, യോഗി ബാബു, റോബോ ശങ്കര്‍ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. എ.ആര്‍ റഹമാനാണ് ചിത്രത്തിന് സംഗീതം ഒരുക്കുന്നത്. കെ.ജി വിഷ്ണുവാണ് ഛായാഗ്രഹണം. നിര്‍മ്മാണം എ.ജി.എസ് എന്റര്‍ടെയ്‌മെന്റ്. ചിത്രം കേരളത്തില്‍ പ്രദര്‍നത്തിനെത്തിക്കുക പൃഥ്വിരാജിന്റെ പൃഥ്വിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്റെ മാജിക്ക് ഫ്രെയ്മസും ചേര്‍ന്നാണ്.